Tarifa di awa ta subi entrante 1 di juli

Entrante 1 di juli tarifa di awa ta subi cu un averahe di Awg. 1.50 pa m3. E aumento ta debi na un aumento drastico di Heavy Fuel Oil (HFO) di ±126%, compara cu aña 2021. Hunto cu e aumento e compania di awa y energia ta introduci un structura di tarifa nobo, cual ta conduci na un particion mas husto entre consumidornan grandi y consumidornan chikito. Clientenan lo nota e aumento di tarifa pa prome biaha den cuenta di awa di augustus 2022. 

Structura di tarifa

E aumento di tarifa di awa ta conduci na un averahe di Awg. 1.50 pa m3. Den practica esaki ta nifica cu consumo entre 0 pa 12 m3 lo costa Awg. 7.25 pa m3 y consumo di 13 m3 bay ariba lo costa Awg. 11,00 pa m3. E tabelnan aki bou ta duna un bista di e structura di tarifa di antes y entrante 1 di juli 2022. 

Tarifa residencial

Consumo m3Tarifa AWG pa m3Antes Consumo m3Tarifa AWG pa m3Entrante 1 di juli 2022
   0 –   3 m3 4.55  0 – 12 m3  7.25
   4 –   6 m3 4.55 13+ m311.00
   7 – 12 m3 6.25   
13 – 20 m311.25   
      20+ m315.25   

E structura di tarifa nobo cu solamente dos bracket, ta trece un particion mas husto entre clientenen residencial cu consumo di awa halto y clientenan cu consumo abou. Ademas, den e structura anterior tawata existi e posibilidad cu residencianan cu entrada abou y consumo halto, lo a paga mas pa awa, mientras cu residencianan cu entrada halto y consumo abou tawata paga menos. Door di introduci un tarifa di awa mas balansa, esaki lo por elimina e posibilidad aki.

Tarifa NO residencial

 Consumo m3Tarifa AWG pa m3Antes Consumo m3Tarifa AWG pa m3Entrante 1 di juli 2022
Comercial   Pa m39.50 Pa m3  11.00
Agricultura, Horticultura y Ganaderia*   Pa m35.50 Pa m3   5.50

*Basa riba compra minimo garantisa di 10 m3.

E tarifa pa clientenan comercial ta subi di Awg. 9.50 pa Awg. 11.00 pa m3. E tarifa pa cunukeronan SI ta keda mescos, Awg. 5.50 pa m3.

Clientenan lo nota e aumento di tarifa pa prome biaha den cuenta di awa di augustus 2022. WEB ta hopi consciente cu un aumento di tarifa lo tin un impacto considerabel riba comunidad y economia di Aruba. Te cu awor WEB a logra absorba e aumentonan tumando medidanan cu impacto grandi riba su operacion. Mirando e desaroyo di aumento di HFO, no ta responsabel mas pa carga e peso aki. Pa e motibo aki WEB ta haya su mes obliga di tuma e decision pa aumenta tarifa. Mientrastanto WEB lo keda vigila desaroyo di prijs di HFO. WEB Aruba ta spera di por conta cu comprension di comunidad di Aruba.

Medidanan interno di WEB

Te awor WEB a sa di absorba e aumento di gasto di HFO, cual WEB ta uza pa genera energia, door di aloca su reservanan. A yega na un punto cu esaki no ta responsabel mas. Pa modera e aumento di tarifa, caminda posibel, WEB a baha su otro gastonan operacional caba cu ± Awg. 6.5 mion. Tambe WEB a acepta di genera menos entrada pa aña 2022 y a vries salario di tur empleado pa aña 2022. 

Door di a tuma e medidanan y cu e aumento di tarifa aki, WEB lo por sigui garantisa un produccion y suministro di awa y energia den futuro. Tambe WEB lo por sigui cu su plan di inversion pa bira menos dependiente di HFO. 

No a tuma e decision di aumenta tarifa di un dia pa otro. Desde 2021 WEB a bin ta informa stakeholders y repetidamente a evalua e decision pa aumenta tarifa, consciente di e impacto cu esaki por tin riba comunidad y economia di Aruba. Mirando e rol vital di e compania di awa y energia pa nos isla, no ta responsabel mas pa sigui aloca reserva di compania pa absorba e gastonan halto di Heavy Fuel Oil. Reservanan di compania ta necesario pa den futuro por keda inverti pa por keda garantisa produccion di awa y energia, y distribucion di awa.