“Manera cos ta mustra na Aruba, no ta necesario pa hisa e edad di pensioen na 67 aña”, asina Hubert Dirksz, Presidente di sindicato FTA, a bisa awe merdia despues di a reuni cu Gobierno den e Cumbre nacional cu gremio sindical y empresarial. Un di e temanan cu a bin padilanti ta e exigencia di Hulanda den e condicionnan pa nos hisa e edad di baha cu pensioen di 65 pa 67 aña. Por lo menos dos sindicato y un gremio comercial a expresa awe nan oposicion contra e condicion aki.
“Loke si ta na Hulanda, cu a hisa e edad di pensioen pa 67 aña pero na mes momento a tene cuenta cu pa cierto funcionnan, por ehempel den cuido medico, cu eseynan automaticamente ta haya oportunidad pa por baha cu pensioen mas trempan, te hasta cu 60 aña”, asina Hubert Dirksz a aclaria. “Ta pesey den e cuadro ey no mester bay den direccion pa aumenta e edad, al contrario ban ahusta e ley, cu pa den cierto casonan lo mester baha e edad”.
Di otro banda, tin sindicato ta bisa cu na Hulanda ora a hisa e edad di pensioen, a baha e cantidad di oranan cu ta traha pa dia tambe. Esey tin biaha ta lubida di trece padilanti, tal bes cumbinientemente. Jan van Nes di e asociacion di cuminda y bebida a enfatisa cu cortamento den orario di trahado no ta un bon idea awo. El a admiti cu awo caba ta trahando menos ora, pero esey ta forsa dor di Covid. “Mi ta di acuerdo si cu e edad di 67 aña, specialmente den e parti di HORECA, ta algo cu mester studia bon. Mi sa den mi experiencia cu tin trabou den hotelnan cu ya caba cu 60 aña e trahadonan no por sigui traha. Mi ta kere cu mester tin excepcion den algun funcion specifico”.
Gina Maduro di sindicato ABV a sigura cu Hulanda pa algun aña caba a baha nan cantidad di orarionan di trabou semanal pa 36 ora. “Nos ta 40 ora pa siman y den hotel e ta yega 45 te 48 ora pa siman. Pues no por compara Hulanda cu Aruba. Nan ta traha hopi menos cu nos. Si nos kier pensa mes pa subi e edad di pensioen na 67 aña, anto nos mester pensa den baha e orarionan di trabou pa siman. Tanten nos no baha orario di trabou pa siman no ta mishi cu edad di pensioen”, asina Gina Maduro a finalisa bisando.
Edad di pensioen na Aruba a subi e ultimo añanan di 60 pa 62 y despues na 65 aña di edad. SVb pa algun tempo caba a cuminsa informa cu mester reforma e ley, sea ta aumenta edad of ta subi e prima mensual.
