Nèt un aña despues di e eksitoso evento gigantesko Velas Latinoamerica 2018 ku 10 tall ship durante algun dia den entrada di nos haf, Kòrsou ta preparando pa yama bonbiní na V/E Capitán Miranda di Uruguay.

Dia 23 di mei último e barku di bela a kuminsá un gira di entrenamentu di sinku luna pasando 19 haf na kontinente Merikano. Entre otro basá riba e bon komentarionan di aña pasá,
armada di Uruguay mesora a aseptá e invitashon di Curaçao Sail Foundation pa
inkluí Kòrsou den su itinerario, tambe den kuadro di e aktividatnan di Dia di Bandera (2 di yüli).

De paso, aña pasá Capitán Miranda no a forma parti di e aktividatnan di Velas den haf di Kòrsou pa motibu di un mantenshon grandi ku a dura mas ku a antisipá. Djasabra awor alrededor di 10 or mainta ta antisipá yegada di ROU 20 ‘Capitán Miranda’ ku tin Montevideo komo su haf di prosedensia. Hustamente pasobra ta trata di un barku di bela ta difísil pa determiná ku eksaktitut ki ora e ta yega. E entrada so ta un atrakshon riba su mes. E barku lo mara na waf di Mathey den Otrobanda. Durante oranan fiho lo ta posibel pa bishitá e barku, tambe dia 2 di yüli komo parti di e selebrashon di e di-35 aniversario di Dia di Bandera i di Himno di Kòrsou den Otrobanda.

Djasabra despues di yegada na Kòrsou nan lo pone tur kos na òrdu pa djadumingu 30 di yüni i djaluna 1 di yüli nan ta habri pa risibí bishitante di 10 or pa 12 or mainta i di 2 or di mèrdia pa 6 or di atardi. Riba e dia liber di 2 di yüli públiko por subi e barku entre 9 or i 12 or mainta i entre 2 or di mèrdia i 7 or di anochi. Despues nan lo prepará e barku pa salida su siguiente dia. Djarason dia 3 di yüli alrededor di 10 or di mainta Capitán Miranda ta bandoná haf di Kòrsou ku tur e formalidatnan di kustumber. Na kuminsamentu di e fakansi di skol famianan por probechá bon pa bai ku e muchanan pa gosa di e atrakshon aki.

Ruta

Despues di a sali for di Montevideo dia 23 di mei, Capitán Miranda ya a pasa e hafnan
Brazileño di Rio de Janeiro i Fortaleza, siguí pa Saint Georges na Grenada. Despues di
Kòrsou e gira ta sigui pa Carthagena de Indias (Colombia), Colón (Panamá), Cozumel
(Mexico), La Havana (Cuba), e siudatnan Merikano Miami, Baltimore, New London,
Newport, Boston i Norfolk, seguidamente Santo Domingo (Repúblika Dominikano), San Juan (Puerto Rico), Castries (St. Lucia), pa atraves di e puertonan di Natal i Victoria regresá
su haf di kas na Montevideo.


Pa e okashon aki e barku tin un tripulashon di 80 persona, entre nan 16 funshonario di
marina di Uruguay, 8 wéspet di e forsanan armá di Argentina, Paraguay, Spaña i Brazil,
pero alabes invitadonan di forsa aéreo, polis nashonal i ministerio di asuntunan eksterior
di Uruguay. Tambe lo tin un representante di marina Panameño i Merikano na bordo
durante parti di e gira.

Comments

comments