Taira gekap: Chauffeur bou influencia a haya lift gratis pa cas

Diabierna anochi polis a para un auto marca Hyundai color shinishi numera A-60052 na altura di Casa Vieja na Tarabana. Un rato prome un otro unidad di polis tabata siguiendo e auto aki, kende tabata core hopi malo riba caminda. E chauffeur, sospecha di ta bou influencia casi no por a para riba su pianan. E taira dilanti banda drechi tabata gekap. E chauffeur tabata pone su propio bida y di otro na peliger. Normalmente, polis ta detene tipo di chauffeurnan asina.

Pero a dun’e un chens y a dicidi di hib’e cas sin tin nodo di detene. Su auto a keda para cant’i caminda. Polis a kita e yabi for di e chauffeur y a dun’e prohibicion pa stuur auto pa un cantidad di ora. Ta bon pa e chauffeur aki sa cu tin instancia cu ta habri pa brinda ayudo en dado caso cu tin problema cu alcohol. 

E reto no ta cu bo tin problema di alcohol of droga, sino cu tin ayudo. Mescos cu bo, tin hopi otro ciudadano cu tabatin of tin e mesun problema cu bo y cu ta dispuesto pa comparti cu bo nan storia di exito, cu awe nan ta liber di alcohol of droga. Ta un grupo cu ta topa diariamente na diferente sitio, pa esun sostene e otro y hunto laga e bicio, cu ta caba cu bo famia, bo carera laboral y sin lubida bo salud.

Alcoholic Anonymous Aruba ta existi pa hopi aña caba y tin reunionnan diario, tanto na nan clubhuis na Sabana Liber na Noord of na Weg Seroe Preto na San Nicolas. Pa mas informacion di orario di reunion of pa por bel y papia cu un boluntario, subi e website: www.aa-aruba.org.

“Hende no ta cambia pasobra nan a mira e luz. Nan ta cambia pasobra nan a sinti e cayente”.