Tai Foo Lee: Si bo no vota diferente no lo bay tin diferencia tampoco

Tai Foo Lee ta candidato number 2 riba lista di Raiz y e ta sinti hopi gratitud. El a splica cu nan a traha duro e ultimo lunanan. Nan ta e ultimo partido cu a bin riba e plataforma politico na Aruba pa participa na eleccion. E acogida tabata hopi bon. A haya hopi palabra di empuhe, di corahe y support. A sinti cu pueblo a compronde e mensahe, cu a conecta cu nan, aunke tabata laat. Asina mes e sosten tabata hopi grandi. Lee a sinti cu nan a compronde loke Raiz a bin pa haci, cual ta educa e pueblo cu tin opcion, educa nan di e importancia di voto. Educa nan di e sistema electoral cu por cana den un miho forma, sin insulto, sin ofensa, respetando otro. Cu balor y normanan tin cu bin bek den comunidad y cu ta cuminsa cu nos mes como politiconan como ehempel.

Material politico
E campaña a bay den un forma creativo. E hendenan cu tabata tin necesidad di esey, e partido a provide un logo high resolution, caminda cu nan mes por a bay print tshirt si nan a sinti esey, of por ehempel bandera. No tabata tin mucho pregunta pa esey. Un di e ehempelnan ta cu nan pagina di facebook ta wordo uza pa agenda politico di cierto partido cu tabata bin ataca. Raiz nunca a ataca bek. For di un principio nan a ripara cu e plataforma ta diferente y nan kier a participa tambe. Por a mira cu nan a cambia e manera cu nan prome approach tabata.
Esey ta loke cu Raiz tabata kier, cambia e hendenan mentalidad. Wak cu politica por wordo hiba na un diferente forma. Hisa e nivel di combersa cu otro, duna opinion tambe.

Mensahe di Lee
Lee ta desea pa tur cos bay na un forma trankilo y democratico. Hopi pais na mundo no tin derecho di voto. Aruba tin e privilegio grandi y mester haci uzo di dje. Si bo no vota diferente no lo bay tin diferencia tampoco. Si bo keda vota y toch critica y no ta contento cu e Gobierno y si bo kier wak un cambio awe, bo tin cu vota pa un partido nobo. Y Raiz lo haci e diferencia ey.