Tai Foo Lee, presidente di Raiz, ta comenta cu hopi comerciante ta acercando nan, mirando cu nan mes ta bin di famia di comercio. Tin hopi grupo ta lanta den comunidad, pero tambe riba medionan social, treciendo puntonan skerpi dilanti.
Por bisa cu den nan area di comercio, tin hopi reto. Diferente gobierno a papia di Red Tape. Hopi hende ta pega cu permiso. Hopi hende no por haya trahado pa traha. Ta ripara cu restaurantnan ta habri nobo, pero no tin hende pa traha. Ta ripara cu e descripcion di e trabao, no ta cuadra cu loke tin eyfo.
No tin e hendenan capacita pa haci e trabao. Esey ta un preocupacion hopi grandi cu ta wak den e sector aki. Ta haya esaki tambe comunica atraves di otro gremionan. Ta algo importante cu tin cu resona na e union. Ta wak cu nan ta pidi pa esey tambe. Gremio y comercio ta pidi pa uni y exigi. No por puntra un hende cu no tin cacho, ki cuminda di cacho pa cumpra.
Ta pensa cu e comerciante no mester dura tampoco e ora pa bay busca solucion cerca gobierno. Sa kico e solucionnan ta. Segun Lee, a yega momento cu tin cu sinta hunto y purba di yega na conclusion of decisionnan concreto, strategico pa por sali afo di e saturacion aki cu tin awo na Aruba.
Ta hopi dificil pa tin gana te hasta di por ta inverti. Tin hopi hende ta sinti e duda grandi eynan. No sa si e temponan ta sigur, no sa kico ta bay logra, kico ta bay resulta.
Lee ta kere cu mester bin moratorium hasta riba restaurant. Tin hopi competencia, cual por wak den e area di hotel. E competencia ta inhusto. A papia esaki tambe durante eleccion.
Door di por ta plama esey den diferente otro camindanan na Aruba, ta haci’e atractivo tambe pa turistanan yega eynan. Ta plama e rikesa tambe y mas hende lo por participa.
Segun Lee tin hopi cos cu lo kier trece dilanti. A scucha hopi eyfo. No kere cu Raiz ta drumi. Lee a splica como presidente cu nan ta hopi activo. A bay eleccion cu cinco candidato. Actualmente ta conta cu 9 bayendo pa 10. Ta bezig ta haciendo formacion di nan hendenan. Data gathering tambe cu ta hopi importante. Raiz no ta haciendo politica a base di atakenan personal. Kier saca articulonan cientifico, academico, analitico. Di e forma ey trece dilanti e preocupacionnan cu ta reina den pueblo, brindando asina solucion, speransa, y no cu ta bay a base di atake personal cu no ta bin cu solucion.
Preparando pa un siguiente eleccion
Segun Lee, despues di eleccion ta hopi importante pa haci un analisis personal di kico a bay fout of kico por mehora. Den esey claramente, como prome biaha a bay cu cinco candidato. Esey ta loke por a haci e momento ey. Pero semper e idea tabata pa crece. E idea pa partido, ta por mas cu 15 candidato, pero ta bezig formando nan mes, hayando diferente curso di diferente experto. Raiz tin nan website y facebook activo y bo sa ken e miembronan di Raiz ta.
Lee a comenta cu si kier acerca e partido, nan ta mas cu interesa pa sinta cu hendenan hoben cu kier traha na bienestar di Aruba. Definitivamente un di e conclusionnan ta, despues di eleccion ta cu mester crece cu cantidad di miembro papor atrae mas hende tambe, como tambe parti e ideologia den pueblo.
Miembronan nobo
Nan tin varios miembro nobo, entre nan Richard Vrolijk, Giovanny Jacobs y dentro di poco lo anuncia e otronan publico, cu nan tambe por papia cu prensa, pa asina nan por cera conoci cu nan.
Raiz ta preparando y ta creciendo poco poco. Kisas den e comunisamento di aña no a mira nan tanto activo den prensa, pero esey no kiermen cu nan ta drumi. Ta activo internamente, mirando cu nan tambe mester a structura. A cuminsa cu un plataforma for di abao y ta rekeri hopi mas tempo, mirando cu e partidonan tradicional, ya nan tabata tin nan plataforma estableci caba.
Raiz mester a crea algo di nada y diferente. Nan ideologia y e manera cu e ta haci, ta mustra cu e tin un bon acogida den pueblo tambe.
Miembro
E liña di partido y e ideologia cu nan tin, ta plama eyfo un mensahe di speransa cu ta spreek aan hendenan di nan propio generacion cu por ta, ta fada den e forma di hiba politica tradicional. Ta alentador e reaccionnan cu nan ta haya y mas hende ta durf di “cross the bridge”.
Ta hayando hopi mas reaccion cu nan mes a spera pa candidatura.
Gobernacion actual
Hendenan a spera un gobernacion diferente. Electorado na 2017, un di e mensahenan primordial cu nan a manda ta, basta cu mal gobernacion y corupcion. Tambe nan a manda un mensahe cu tin cu bay traha hunto. Pero lastimamente, no ta sinti cu e pueblo ta wordo scucha. Si wak cu aña a habri, tanto sector priva, sector publico y social, ta pidi participacion y input riba decisionnan cu ta wordo tuma, pero no ta brinda e oido.
Esaki tambe ta crea cu den pueblo un inconveniencia, caminda cu pueblo ta keda exigi mas y mas y dado momento no por pidi mas. Aunke cu pa hopi tempo ta civilisadamente desobediente, pero ta yega un momento cu ora bo no scucha bo ta tuma pasonan drastico.
Pesey Raiz kier impedi esey. No mester mira leu.
Na 2008, Venezuela a wordo indica como e pais mas feliz na mundo. Wak unda nan ta awe.
Na 2016, Aruba tabata e pais mas feliz na mundo. Awendia, si cana den comunidad, sigur gran parti di nos pueblo, no ta feliz, manera cosnan ta bayendo. No kier pa e bay manera con Venezuela ta awe. Corupcion y mal gobernacion ta esey ta loke nan ta causa.
