E lidernan religioso di nos pais a bay reuni cu gobierno. Na salida di esaki a haya oportunidad di scucha for di algun lider kico ta nan prome reaccion pa locual ta trata e decision cu gobierno tin di tuma referente e ley di matrimonio di mesun sexo y si tin intencion di bay casacion.
Prome pa hiba palabra durante encuentro cu prensa pafo di bestuurskantoor ta pastoor Jairo Maduro (Iglesia Catolico) cu a indica na prome luga, di a ricibi invitacion, den fin di siman, di algun parlamentario pa reuni y asina vocifera nan preocupacion pa locual ta trata e sentencia cu hof a dicta, tanto pa Aruba como nos hermana isla Corsou.
Pastoor Jairo a duna di conoce cu nan como religioso y tal como e carta magna ta e palabra di Dios ta indica, ta sinti cu nan tambe tin cu vocifera nan pensamento. Igual cu pensamento di gran mayoria, bida di famia tin di keda entre homber y muhe cu e proposito di procreacion.
Bibando den un tempo bastante complica cu pensamento habri , no por kita for di bista locual cu e hof ta trece dilanti/ ta dicta.
Den su parecer, no por denomina e acto aki un matrimonio como cu matrimonio ta basa riba union y uzo di e palabra matriz cu netamente ta bin di e curpa humano di un hende muhe, cu ta uni cu esun di hende homber. Cu e proposito di forma famia y bin na yiu (nan).
Matrimonio ta di importancia y ofrece sociedad yiu (nan), hende cu ta crece den ambiente di famia cu preparacion den balor (nan) pa sirbi nos pais.
E iglesianan a dicidi di uni y yega hunto pa trece nan pensamento pa dilanti, ta locual nan a haci: “Nos no ta di acuerdo”, ta locual pastoor Jairo a expresa. Ta locual nan a indica tambe na gobierno durante reunion y ta keda na e gobernantenan pa dicidi si ta bay casacion cu e caso aki.
Iglesia no ta yama pa discrimina, un tendencia homosexual nunca ta pica, no t’ey pa husga pero na momento cu e bira accion esaki ta bira otro cos. Tin cu biba cu respet y amor pa dios y tin cu paga tino cu esaki riba nos pida baranca.
Tambe a hiba palabra Dominee Peter Hazenoot di Kerki Protestant tanto di Piedra Plat como esun di San Nicolas. E dominee a indica cu a vocifera nan preocupacion pa henter e isla aki y cu ta sinti nan mes presiona riba locual kier impone cu e sentencia aki.
A indica tambe e preocupacion cu e situacion aki ta nifica pa e Kerki / pa e religion. Den un pais cu semper a duna di conoce cu tin libertad di expresion y di religion pero ta bou presion enorme y manera ta indica tambe den bijbel, cu no por sirbi dos Dios. Den e momento aki tin un escogencia pa bay haci.
Aruba semper un isla bendiciona y cu ley di Dios semper den consideracion.
Si bay actua den conflicto cu mandamento di Dios, nos lo busca desgracia riba nos mes. Contra tur obstaculo cu semper a presenta riba nos isla, nunca nos a pone Dios un banda y cu bos halto nos a expresa semper cu “Nos ta bendiciona” pero pa mantene esaki nos tin cu sigui riba mandamento y palabra di dios.
Dominee Hazenoot a remarca cu iglesia su preocupacion di mas grandi ta, cu si un bes aki, lo tin e libertad ainda, cu for di e stoel di predicashi por yama pica esey ainda. Kico lo significa e ora pa comete un pica. Iglesia su tarea ta pa trece e palabra di Dios dilanti y no pa duna opinion.
Mas di binti siglo di historia caminda iglesia semper, den mayoria absoluto, a duna di conoce cu matrimonio ta entre un homber y un muhe. Si bay contra esaki, kico ta bay predica e ora. Lo tin cu pasa cu mester bay corte pa asina por predica e palabra di Dios sin keda perhudica pa ley?
Prome cu acepta algo asina, ta apela na e gobernantenan pa hinca rudia y pidi Dios pordon pa locual cu kier haci y por sigui carga nos religion y creencia sin miedo algun.
Frank Daal di Good Samaritan Christian Center, pero tambe miembro di grupo di 45 pastoor bou organisacion Iglesianan Cristian Aruba (ICA) y den representacion di e pastoornan aki durante reunion cu gobierno.
A forma un grupo religioso uni, tanto Catolico, Protestant y diferente otro dominacion religioso, a bay na prome minister cu e peticion pa bay casacion y sigui cu esaki, como cu kier mira e matrimonio manera Dios a diseñ’e keda preserva.
Cu meta pa proteha e muchanan, famia y te hasta e siguiente generacion. A presenta cuater argumento, casacion cu ta e unico caminda cu tin pa gana ainda, como tambe e sistema di educacion y con pa cuida esaki. Mayornan tin e mandato di Dios pa duna nan educacion riba nan identidad, aceptacion, amor , norma y balor y no ta tarea di scol pa haci esaki.
Frank a indica cu locual a presenta aki na e reunion cu gobierno den bloke ta representa mas di 90% di e comunidad cu ta Cristian y cu no por keda keto y laga cos pasa bay. Tin di sali y defende Fe Cristian y para pa e cosnan aki.
Reunion cu Prome Minister Evelin Wever-Croes riba su mes a bay hopi bon, a pasa riba tur punto. Di su banda e tabatin algun pregunta. E no tin un posicion fiha ainda y tin di bay busca conseho pa despues pidi pa un reunion un biaha mas pa sigui delibera.
Daal a vocifera cu berdad nan ta den representacion di 90% di e comunidad Cristian pero nan tambe tin di haci nan parti y expresa nan mes. Un situacion cu a bin di sorpresa y forsa cu tampoco no ta bon. Ta confia cu e pueblo di Dios lanta tambe pasobra nada troci no ta sali bon.
Si acaso casacion no resulta, tin un accion di firma tumando luga y asina duna tur hende e fair chance di firma pro of contra di matrimonio di mes un sexo, tras di esey un referendum caminda atrobe pueblo ta bay haya e chens di expresa nan Fe Cristian, despues di e punto ey no sa mas kico por haci pero ta keda den man di e pueblo.
Pastoor Norman Browne di Evangelical Church of San Nicolas, a añadi cu durante reunion a trece dilanti y urgi gobierno pa bay casacion, cu un punto caminda a indica cu e veredicto di hues no ta basa riba argumento huridico solido, hues a uza algun expresion/pensamento riba derecho, pero Aruba ta firmante di e tratado Europeo riba derecho humano y e organo aki a dicta cu matrimonio no ta un derecho humano pa pareha di mesun sexo. E ley ey ta mas halto cu e leynan di Aruba. Si a tene na cuenta cu e ley ey, nunca hof lo por a yega na un decision asina ey.
Ta considera e veredicto activismo di e magistratura. Nifica cu a uza ‘ideologia’, di e grupo LGBT, enbes di locual e ley ta prescribi. Basa riba e punto aki tambe a urgi gobierno pa bay casacion cu e asunto aki.
