“Ta su ora cu Jona” ta celebra su prome aña awe

753

Awe e programa cu tin un sintonia masal mainta riba Aruba, esta “Ta su ora cu Jona’, ta cumpli 1 aña. Ta un aña completo di entretenimiento tur dia na Canal 90, den cual ta combina oyentenan siguiendo via Canal 90 na cas, na trabou of den auto, mientras cu esunnan riba internet por sigui’e tambe riba Facebook.

Tabata aña pasa 19 mei 2019 cu propietarionan di Canal 90 a dicidi di sigui innova y trece cambionan necesario pa e radio por cosecha mas exito den nan 45 aña di existencia. Ta den e cuadro aki a acerca e conocido locutor Jonathan Lake pa tuma e reto y presenta su programa den ora di mainta.

Esaki tabata algo nobo pa e locutor mirando cu semper tabata super exitoso pa hopi aña cu su programa den oranan di atardi. Tur esaki a pasa pa historia riba e prome dia caba cu e programa a cuminsa, un programa di super bon musica pa grandi te chikito cu un variedad completo y un animacion diferente.

E concepto di e programa “Ta su ora cu Jona” ta encera musica varia pa tur edad, noticianan di entretenimiento, conciertonan, promocion di eventonan, informacion di deporte y hopi mas. Den solo palabra, un programa yena di contenido varia, cu musica y entretenimiento.

Jonathan Lake ta gosa di un sintonia grandi mainta mirando cuanto reaccion ta hayando den yamadanan Live On Air y tur mensahe di saludos. Lake ta masha gradici na tur su oyentenan pero tambe specialmente na comercio cu semper a deposita nan confiansa den e programa.