Ta spera cu pa e siman aki lo tin un of mas vuelo pa soluciona e problema na Guarda Nos Costa

699

Despues di a caba di reuni cu e empleadonan di Guarda nos Costa y tambe sindicato diaranson atardi, minister Andin Bikker a duna su prome reaccion pa loke ta trata e situacion na Huis van Bewaring y FOL.

E mandatario a splica cu tin diferente cos cu ta tumando luga cu ta contribui na un situacion cu nunca antes a yega di pasa como pais.Tin basta siman, bayendo pa lunas caba cu nos ta enfrenta e cierre di frontera cu Venezuela. Prome cu esey a haya un fluho di buscadonan di asilo, cual na mei 2018, tabata tin rijnan largo na Dimas ta busca asilo.

Minister Bikker su reaccion despues di reuni cu trahadonan di Guarda Nos Costa

Posted by 24ora on Wednesday, August 12, 2020

Un porcentahe grandi a haci y ta haciendo mal uzo di e posibilidad di pidi asilo. Hecho ta cu tin basta persona, miles di persona, cu ta na Aruba sin un status.Tin cu ta descubri nan durante controlnan. E ultimo lunanan aki a bin topa cu personanan cu durante Toque de Queda, personanan cu ta zelfmelders, cu kier bay bek nan pais.Problema cu ta enfrentando ta cu pa simannan caba, no tin un apertura cu e frontera di Venezuela. Den juni tabata tin tres vuelo planea cu ultimo momento a cancela.

A enfrenta tambe cada bes cu tabata tin aspectonan diplomatico cu tabata pasa cu nan na ultimo momento cu ta bin un cancelacion. Esey ta pone cu tin persona cu tin basta tempo cu nan ta na Aruba y/of na FOL priva di nan libertad, en espera di e vuelonan y nan a cuminsa fada y cuminsa expresa esaki tambe.A purba diferente manera, via diferente delegacion pa intermedia. A traha lista di nan preocupacionnan. A evalua un maneho cu a yama Openbare Toetsbeleid.

Kico esey kiermen?

Esnan cu a sali for di KIA cu ta personanan cu a comete un crimen of delito, no por laga nan liber. A bin cu un maneho tambe cu esnan cu a bin via boto cu no sa si nan tin pasado hudicial, si nan ta peligroso si of no, cu a retene nan.Esnan cu di un manera of otro cu nan por a haya un garantsteller, a evalua pa duna nan e oportunidad di laga nan bay cu e condicion di “meldplicht”. Asina a bin logra baha e presion.Pero no obstante tin por lo menos 50 persona of mas cu ainda ta wanta na Huis van Bewaring. E personanan aki ta causa cu nan ta expresa nan frustracion pa e situacion cu nan ta bibando.

Solucion

Segun e minister, a papia cu e embahador di Hulanda na Caracas, kende a duna speransa y positivismo cu e siman aki si lo por ta bay tin un of mas vuelo.Los di esey a papia di un comision di intermediacion, mirando cu Trinidad & Tobago recientemente a yega na un intercambio maritimo cu e pais bisiña.Nan a presenta tambe e comision di detenidonan y a presenta cu un solucion caminda cu nan tin personanan cu tin familiar di pesca cu lo por bin topa nan na e frontera cu Aruba y haci intercambio. Esey no lo ta necesario si lo bay tin vuelo e siman aki, cual lo keda observa.

Estado federal

Aruba awor aki ta den un estado federal. Aruba, St. Maarten, Corsou y Hulanda ta parti di reino Hulandes.Den articulo 3 di statuto di reino Hulandes ta bisa cu e parti di relacionnan exterior ta cay bao di Hulanda. P’esey Aruba ta dependiente di Hulanda pa nan intermedia.P’esey mester a papia cu e embahador di Hulanda pa nan sigui intermedia den esaki. Casi tur dia tin contacto, desde cu a bin posibilidad di Trinidad & Tobago.A haya un lista di embarkenan peskero si esey ta bay ta un opcion. Pero ta spera si cu e siman aki ta bay tin un of mas vuelo pa por alivia e situacion aki.