For di Instituto Coreccional Aruba (KIA) fuentenan ta sigura na nos cu eyden ta un berdadero desaster. Separa di un demotivacion grandi bou di e trahadonan, disgusto bou di e presonan, tambe mester traha den un ambiente di un infrastructura hopi deteriora. Minister Andin Bikker a priminti cu lo drecha e luga pero nada ainda. Mientras a cuminsa papia di construi un prizon nobo na Barcadera, te ainda no ta papiando di con lo drecha e infrastructura existente na Santo di Patia, pa evita e tipo di scapamentonan manera a sosode awe marduga atrobe.
Ta di tres preso cu ta huy tras di otro. Minister Andin Bikker ta bay den historia como e politico bou cual mas preso a huy te awo, for di KIA y Warda di Polis. Ta hopi aña pasa cu un preso a yega di huy for di prizon mes. Den pasado presonan a huy for di Corte, durante transporte of hasta for di dentista. Pero di prizon no ta algo cu ta sosode regularmente.
Pero awor cu di tres preso a scapa sin cu ningun cuidado di preso ni personal di CEA a tuma nota, ta demostra cu tin un problema structural den prizon. Apenas Gino Winklaar, un Alto Inspector di Polis, a acepta e reto pa drecha KIA, cu ya den su prome dos lunanan di prueba, presonan ta huy dos-dos. Esaki sigur no ta duna un impresion di mehoracion, sino mas bien di un deterioro enorme den e organisacion.
Fuentenan a sigura cu presonan hoben den e hala hubenil di prizon tin “master key” di e portanan di cel y ta move eyden di un seccion pa otro sin problema. Ta via basta porta mester a pasa awe pa por a scapa di prizon, mustrando claramente con mal organisa KIA ta na e momentonan aki y cuanto poder y acceso presonan tin eyden.
Bale la pena un investigacion interno di con e presonan a huy, ken a duna nan e yabinan y cu ki meta? A paga e cuidadonan di preso pa e “fabor” aki? Cuanto yabi mas ta circulando den KIA? Parce cu den e hala hubenil e yabinan ta masha popular. Kisas mester evalua pa laga Marina Real Hulandes tuma mando over den KIA awor cu ta bisto cu Minister Andin Bikker no por garantisa comunidad cu e ta capaz di wanta presonan peligroso tras di tralie.
Pa loke ta e dos presonan fugitivo awo, esta e rumannan Jorge Antonio Ramirez y Joander Antonio Alexander Ramirez, ambos ta cera for di aña pasa sintando castigonan largo pa un serie di atraco cometi entre 19 di september pa 2 di october 2018, uzando arma di candela y arma blanco, pero tambe a acusa nan di secuestro, menasa y maltrato.
A comete e atraconan riba Well Done Truck na Rotonde Las Americas; Ritz na Savaneta; un intento di atraco na Supermercado Tur Dia na Tanki Leendert, unda cu a los un tiro ora cu un Chines a tira nan cu un boter pa spanta nan. Despues di e fracaso ey, riba e mesun dia a tira atraco riba Rowigini’s y Rey Hing Bar Restaurant. Prome cu tur esey, nan a tira un atraco tambe riba Citgo Tanki Leendert, unda cu a bay cu un suma chikito pero a laga e empleado hopi traumatisa cu pa algun tempo e no por a traha mas.