Na Directie Volks Gezondheid (DVG) ta reinando un situacion masha fastioso despues cu un colega di nan, mr. Jayburtt Dijkhoff, hurista na e departamento, a manda un carta conteniendo varios acusacion serio den direccion di e Director di DVG. E carta aki tabata crea un impresion cu e empleado aki tin sosten di su coleganan den su ponencianan y acusacionnan.
Pero asina cu e carta a “lek” den un solo medio afilia na e partido den Gobierno, cu e empleadonan a lanta contra nan colega. A sigui un cantidad di e-mail, SMS y Whatsapp cu un tono menasante den direccion di e Hurista, cu a pone cu mesora el a manda un carta pidiendo despensa y rectificando locual el a skirbi y manda pa Minister Dangui Oduber.
Carta di despensa na tur empleado di DVG
E empleadonan a sinti nan mes masha malo pasobra a insinua cu nan tur ta contra e director, contra su maneho y cu ta pidiendo su cabes. Mayoria ta consciente cu DVG pa e ultimo decadanan no tabatin un director. Semper tabatin un director interino of un Management Team. Esaki a haci cu ora a nombra un director porfin, mester a practicamente cuminsa for di 0 cu trabou di introduci maneho, crea vision y mision pa e departamento, crea manual pa empleadonan, posibilidadnan di crecemento, responsabilisa cada empleado pa su trabou y asina por sigui menciona. Den e proceso e Departamento di Recurso Humando (DRH) di Gobierno a hunga un rol importante.
Den tipo di momentonan asina semper tin dos grupo, esunnan cu ta anhela cambio, transparencia y igualdad pa tur empleado. Di otro banda tin e grupo cu lo opta pa continuacion y semper ta teme cambio. Den e grupo aki tin no menos di 15 empleado cu Minister Dangui Oduber a tuma den e 6 lunanan di gobernacion, sin cu tabatin vacatura habri ni presupuesto na DVG pa paga nan. Precisamente e grupo aki di empleadonan “nobo” ta purba causa problema den DVG, pa cual e empleadonan cu mas aña y cu no a drenta via e “porta politico” ta masha disgusta y ta sinti cu e polarisa nan departamento pa motibo di politica.
