Departamento di Cultura di Aruba tin e grato placer di anuncia na boso e detayenan di produccion di e obra musical Mi Bario, The musical. E obra aki ta un iniciativa local priva y DCA t’ey pa sostene artistanan local y nan initiativa den tereno di arte en general, herencia cultural, den forma fisico y no fisico.
Ta trata di un obra musical masha caluroso cu musica excitante di teatro, produci y dirigi pa Sr. Franklin Edmundo Kock. Señor Kock ta un Arubiano cu un carera amplio di mas di 40 aña den baliamento y tambe como instructor di bailenan Latino y producionan teatral. El a traha tambe den e tereno di medicina na Aruba, Boneiro y Hulanda.
E obra musical ta explora e mundo compleho di emocion y otro relacionnan personal di e figura principal, ora cu e ta regresa su pais y bario despues di un ausencia di mas di 30 aña. E première di e obra ta bay ta na Cas di Cultura den luna di augustus venidero.
E presentacionnan lo ta dianan 2, 3 y 4 di augustus pa 8’ or di anochi; e anochi di apertura estilo Red Carpet ta diabierna dia 2 di augustus pa 8 or di anochi. Bendemento di ticket ta cuminsa den luna di juni: $30,-, $50,- pa e anochi di apertura. E obra musical ta pa mayor di 13 aña.
Mi Bario, The Musical ta atrae un audiencia varia, specialmente esunnan cu a biba of ta bibando leu for di nan pais of isla natal y ta regresa despues di hopi aña.
Den e obra musical aki, e figura principal Pedro Johnson ta hiba e publico cu ne riba un biahe den su sentimentonan profundo, mientras cu e ta deal cu e perdida di su mama y e anticipacion pa bolbe bek na su bario di infancia. Cu un elenco di mas di 30 actor, bailarin y vocalista local Sr. Kock a contrata Charles Croes como coach di actuacion. Sr. Croes, un autor local y trainer di actor cu a aparece tambe den pelicula, na television y riba stage local y internacional.
E pasion di señor Kock pa teatro y arte a cuminsa na edad di cuater aña, ora cu el a presenta un piesa di ‘rock and roll’ riba stage di Lago Heights Club na Aruba.
Su famia semper a encurashe den su amor cu e tabatin pa baile y presentacion y esaki a hib’e na un carera di arte largo cu hopi logro. El a balia cu Scol di Baile Simadanza na unda el a studia ballet clasico, y estilonan di baile jazz, moderno y folklorico. Cu Simadanza el a presenta durante e halftime show di Super Bowl XIII na Miami Florida na aña 1979. Otro logro di Sr. Kock ta choreografia y el a dirigi e show hopi famoso, Aruba Night y tambe Caribbean Jamboree Show den cooperacion cu e compania local De Palm Tours; e tabata director artistico di Brazilian Samba School ‘Os Malandros’ na Eindhoven, Hulanda di aña 1993 pa aña 1995; y a asisti na produccion y direccion di diferente obranan di teatro musical escolar, durante e tempo cu el a biba na Hulanda for di aña 1989 te aña 1995.
E idea di e obra aki a nace 27 aña pasa, tempo cu Sr. Kock tabata biba na Hulanda y ta su prome obra di e caliber aki. ‘Mi Bario, The Musical’ ta contene grabacion di musica Afro-Cubano, Salsa y Jazz Latino di Rubén Blades, ganado di diferente premio musical como cantante, compositor y musicante. Sr. Kock ta fungi como voorzitter di Dance Aruba Foundation, bou di cua ta cay Scol di Baile Pachanga, na unda e ta continua ta duna les di baile Latino y di fitness.
Cas di Cultura ta situa na Vondellaan 2, Oranjestad, Aruba. Ticket di entrada lo ta obtenibel den luna di juni.
DCA ta applaudi e iniciativa aki. E ta remarcabel y esencial pa nos sigi duna sosten na nos artistanan local y ta hopi contento di por duna sosten na e proyecto aki en particular. Nos ta desea Sr. Kock hopi exito cu su obra.
