Ta pidi pa actualisa e informacion di cuenta di banco na Departamento di Impuesto

Manera conoci, ora ta trata di restitucion di impuesto, Departamento di Impuesto ta duna e cliente su restitucion unicamente via banco.

Pa esaki e cliente ta laga registra e number di cuenta coriente di su banco pa e proceso di restitucion por cana manera stipula. Ultimamente Departamento di Impuesto a constata cu tin varios caso caminda cu e suma di restitucion no ta pasa pa e cuenta di e cliente debi cu e number di cuenta ta incorecto of e number di cuenta no ta registra na Departamento di Impuesto. E consecuencia ta cu e cliente no ta ricibi su restitucion di impuesto.

Registra number di cuenta coriente
Departamento di Impuesto ta registra e number di cuenta coriente di tur cliente, sea cu ta di un empresa of persona individual. Na momento cu un cliente cambia di banco of cambia di number di cuenta, e mester acudi na Departamento di Impuesto pa registra e number nobo. Tuma nota cu no por registra e number di un cuenta di spaar. Ademas e number mester ta di un banco local.

Formulario di registracion
Pa registra of actualisa e number di cuenta coriente, mester yena e formulario ‘Opgaaf bankrekeningnummer particulieren’ y si ta trata di un empresa – cu no ta un ‘eenmanszaak’ – ta yena e formulario ‘Opgaaf bankrekeningnummer bedrijven’. E formularionan aki ta disponibel na e oficina principal na Camacuri of via e website di Departamento di Impuesto www.impuesto.aw. Mester yena e formulario completo y corecto y despues ta pone un copia di identificacion valido (cedula, paspoort of rijbewijs) hunto cu e formulario. Na final ta entrega e documentonan na e balie di recepcion na Camacuri. Si ta trata di un empresa cu ta un persona huridico (pues no un eenmanszaak), mester pone acerca tambe un copia di e registro na Camara di Comercio.
Ta consehabel pa e cliente duna tambe su e-mail y/of number di telefon pa por si acaso mester tuma contacto cu e cliente.
Por autorisa un otro persona of empresa tambe pa haci e tramitenan aki pa e cliente. Pa esaki ta rekeri un carta di apoderacion y un copia di identificacion valido di e persona cu ta wordo apodera. Si ta trata di un empresa,
Departamento di Impuesto ta pidi tambe un copia di e inscripcion na Camara di Comercio.
Ta hopi importante pa registra e number corecto di cuenta coriente. Kisas e cliente a cambia di banco y a lubida di pasa actualisa su datonan. Si cliente no ta sigur, e por yama Departamento di Impuesto prome na 5227423 pa verifica si e number di su cuenta coriente ta na ordo. E operador lo por verifica esey of por pidi pa wordo pasa pa e seccion ‘Registracion di cliente y obheto’, extension 633, 709 of 713.
Departamento di Impuesto ta haci un apelacion na tur cliente pa actualisa nan number di cuenta mas pronto posibel pa asina e proceso di restitucion por keda completa.