Ta pidi cooperacion di docentenan pa wak e interes di e studiante na prome luga

4

Minister Rudy Lampe di Enseñansa a comenta cu a avisa tur studiante despues di un carta cu a bin for di Inspeccion di Enseñansa, cu a pidi pa e minister por alinea e opleiding cu e decision cu a bin tumando luga na nivel di EPI, pa bay riba e nivel di BKS (Beroeps Kwalificatie Systeem) y esey ta ofrece un miho futuro pa esnan cu ta scoge un opleiding.

E minister ta sigui splica cu a avisa e studiantenan cu mas pronto posibel lo bay indica na nan ki dia ta bay indica e opleidingnan aki. E minister a agrega cu door cu ta trata di un beroepopleiding anochi, e ta hopi mas flexibel qua temporada cu ta cuminsa. Por ehempel na september normalmente ta cuminsa y mientras cu scol regular ta cuminsa na augustus. Esaki no ta un scol regular.

Minister Lampe: Mi ta drenta cu mesun actitud pa reuni cu docentenan di OAA

Posted by 24ora on Monday, September 9, 2019

 

Pesey ta yam’e Tweede Kansonderwijs. Ta educacion pa adulto. Na januari 2017, e cursonan di Openbare Avondleergangen Aruba (OAA) a cuminsa mientras cu e mester a cuminsa na september 2016, bao di e gobierno anterior. Tambe mester a tuma mas tempo pa haci algun ahuste. No ta prome biaha el a tuma luga, sino cu el a tuma luga bao di maneho di minister Michelle Hooyboer.

 

Studiantenan no a wordo notifica

Segun e minister, e diferente secretarianan a keda di yama cada un di e studiantenan, segun e datonan cu tin di nan. Por ta cu mester bay investiga e ora kico exactamente lo a pasa cu algun por ta no tabata alcansabel e momento ey pa avisa nan. Pero e idea tabata pa avisa tur studiante, cu mas pronto posibel e lesnan lo inicia y lo avisa nan, pasobra tin dato.

 

Con ta para cu e docentenan

Segun Minister Lampe, tur decision cu e tuma, ta wak e interes di e studiante. E decision aki cu Inspeccion di Enseñansa tambe a tuma, ta na interes di e studiante mes. Pakico e studiante ta bin anochi haci full un opleiding, ta pesey e kier stroom door y bay EPI, un dado momento y haya un miho posicion y mehora su salario.

Tin tambe cu ta haci’e pa hobby. Tin hende di 50 aña cu kier sigui un vak. Ta bay ofrece cursonan cortico pa siña un vak, pa esnan cu no ta tanto interesa pa haci un carera.

Pero pa esnan cu si kier, e cambio aki tabata necesario. Pasobra si no bay riba e sistema aki, no tin aansluiting. Awor aki EPI a anuncia cu nan lo bin cu nivelnan mas abao di MBO anochi tambe. Esey ta net fit hopi bon pa esnan cu ta haciendo opleiding aki. E cambio aki ta pa bienestar di e studiantenan.

Un docente tey pa sirbi e studiante, segun Lampe. Pesey ta pidi cooperacion di e docentenan pa wak e interes di e studiante na prome luga. E docentenan aki tin nan fulltime job mainta of nan ta pensionado, cu tin nan entrada caba. Nan no ta biba di esaki. Esaki ta un opcion cu nan tin anochi, si kier gana algo extra, por dicidi pa esaki.

Ningun hende no ta obliga un docente pa haci esaki. E no ta su trabao. Esaki ta, por scoge pa keda cu bo famia anochi of ta bin haci algo extra. Esaki ta boluntariamente e docentenan aki ta bin, pasobra kier gana algo extra, haciendo e trabao aki pa e studiantenan.

Ta aprecia cu nan a dicidi y tin di nan tin hopi aña ta sacrifica un anochi pa bin duna les. Ta gradicido y aprecia esey. Pero nan no ta obliga pa haci’e. Ni financieramente tampoco, pasobra nan tin nan trabao caba. Nan tin nan full time job. Esaki ta djis algo extra.

E algo extra aki e ta varia. Un aña tin mas studiante y e otro aña tin menos studiante. Tin biaha tin ora, otro biaha no tin ora. E sistema aki ta asina e ta traha, segun e mandatario.

 

Falta di comunicacion

Segun minister Lampe, el a bin varios biaha pa dialoga cu nan. E docentenan mes a indica na bestuurskantoor, caminda cu el a ricibi grupo di studiante, cu mester revisa bek e opleidingnan. E señal ey a bin di nan mes. Loke tabata duna den aula, no tabata coresponde loke cu tabata tin riba papel. Nan tabata duna un nivel mas halto di loke e studiante ta haya. Pesey ta nan mes a duna indicacion ey, cu mester bin un revision di e opleidingnan aki. 

Awor aki ta mira cu Inspectie tambe a cay aden y a bisa pa bay revisa y actualisa y bin enberdad cu un opleiding cu ta duna perspectiva na e studiantenan. Ki bal bo ta ofrece nan algo, djis duna les pa duna les y despues no por stroom door. Esey tampoco no ta corecto, pa trata studiantenan asina. Tey pa habri porta, habri miho futuro pa e studiantenan, Lampe a splica.

 

Proposicion pa dia 31 di december

Pa loke ta e sistema di losse uren, e minister a presenta diferente opcion riba mesa, cu un di e opcionnan cu a bisa, ta e opcion eynan. Pesey a bisa nan despues di un siman, e minister ta bin bisa nan, despues di evalua tur e factornan cua ta e miho decision y ta esey awor aki, cu  hasta Inspectie a interveni, ta un factor clave den e decision cu a cay, e mandatario a splica.