Holiday Inn cumpliendo 50 aña sirbiendo nos turismo

Cincuenta aña ta motibo pa celebra y esey ta loke staff y personal di Holiday Inn ta haciendo, mirando cu e hotel aki ta un di e hotelnan di mas bieu operando na Aruba. Y ta pa e motibo ey nan a bin cu un galeria di potret.

Kevin Anderson, Gerente General di e hotel, a splica cu su director di mercadeo, Eva Ruiz a haci un tremendo trabao den selecta potretnan cu ta representa e hotel den su totalidad. Tin potretnan di construccion cu a tuma na 1968 y tambe, mientras cu mira e cronologia di e potretnan, cu ta finalisa te na esun di mas reciente.

A mantene su nomber

E empleadonan ta hopi orguyoso riba e hecho cu a cuminsa como Holiday Inn y a keda cu e mesun nomber pa tur e 50 añanan aki, Anderson a splica.

Plannan pa futuro

Tabata tin hopi combersacion, pero te ainda no tin nada concreto pa loke ta plannan pa futuro.

Contribucion

Sigur Holiday Inn a contribui tremendamente na e economia di Aruba. E storia di nan exito a keda representa den e galeria aki. Esaki ta representa tur hende. Mayoria di e empleadonan tabata t’ey presente. E rason pakico a scoge mayoria di e empleadonan riba potret, ta pa motibo di nan asociacion cu e huespednan atrabes di e añanan.

Holiday Inn cumpliendo 50 aña sirbiendo nos turismo

Holiday Inn cumpliendo 50 aña sirbiendo nos turismo. Click e link pa mas https://24ora.news/2lLDaAE

Posted by 24ora on Monday, September 9, 2019

 

Pionero

Veronica Romero, trahando den accounting department como Accounts Payable, ta un di e trahadonan cu tin hopi mas aña trahando pa Holiday Inn, cu ta 46 aña. Segun Veronica, Holiday Inn ta un hotel dushi pa traha y ta pa e motibo ey mes e tin asina tanto aña trahando. El a cuminsa tempo cu e hotel tabata un edificio so. El a conoce hopi GM y ta hopi agradecido pa e oportunidadnan cu el a haya na Holiday Inn y e ta hopi contento, el a splica.

Hopi cambio

Veronica ta conta cu tabata tin hopi anecdota cu ta memorabel. E mes a cuminsa den housekeeping. Despues di cinco aña el a bay den e departamento di accounting y e ta eynan te dia di awe. Ta un experiencia hopi bon, Veronica a splica.
Por consider’e como un pionero den turismo y e ta hopi orguyoso di ta parti di e 50 añanan di Holiday Inn.

Relacion cu ATA

CEO di Aruba Tourism Authority, Ronella Tjin Asjoe-Croes, a splica cu semper ta un honor pa t’ey presente pa gradici y reconoce loke ta e curason di nos industria turistico, cu ta e hendenan cu ta labora den dje y cu ta forma parti di nos comunidad.
Ta masha bunita pa mira con Holiday Inn ta duna atencion na esey y sigur reconoce tur den lobby, y tur caminda riba e propiedad y tambe con nan ta conta e storia di Holiday Inn y unda nan a cuminsa. Celebrando 50 aña aki na Aruba, sigur ta algo di conta y con nan ta pone accento riba esey, pa asina comparti cu nos bishitantenan.
Nan ta haciendo esfuerso cu nos comunidad. “Ta sigur un momento pa para keto unda nan a cuminsa, para keto cu socionan sumamente importante pa Aruba y para keto na con nos a progresa durante e añanan. Semper ta bon pa refleha,” e ehecutivo di ATA a comenta.

Iniciativanan

Segun Croes, ya caba ta papia di diferente manera con pa yuda hiba e mensahe, tur e storianan dilanti. No solamente haciendo uzo di nan canalnan di comunicacion, pero como ATA tambe semper ta dispuesto pa colabora cu nan socionan clave, pa asina transmiti mensahe di historianan unico y bunita asina aki.
Tin como Aruba, un di e porcentahenan mas halto den Caribe di hendenan hopi fiel y cu ta ripiti. Y nan semper ta hopi interesa. Nan ta sinti nan parti di historia y progreso di Aruba.
Semper nan ta hambriente pa scucha tipo di informacion asina aki.
Croes a bisa cu e por a compronde cu hopi di nan a yuda sigura pa tin materialnan awe, mescos tambe empleadonan eynan cu tin di nan tabata t’ey na momento cu tabata construyendo e hotel, cual ta hopi remarcabel, cu sigur a haya material asina aki y awor aki expone nan.