Manera custumber, Star Fashion ta kima su tradicional pagara, e biaha aki pa 3’or di atardi, manteniendo asina dentro di e protocol estableci pa Gobierno.
Pero, e biaha aki nan ta haci’e, kimando asina un popchi, of manera cu nan ta yam’e na paisnan Latino Americano, un Monigote of Muñeco, representando e aña bieu, e pandemia cu nos ta bibando tur parti di mundo
Segun Solanys Quintero, propietario di Star Fashion a splica cu nan lo kima e aña bieu aki na Star Fashion. Nan ta pone un pagara di 100 tiro hunto cu esun cu nan ta cumpra pa e luga mes. Sigur ta un idea peculiar, pero sigur cu un nificado sorprendente.
E biaha aki a opta pa tin e imagen di e notorio presidente Nicolas Maduro como popchi, pa asina core cu e fucu di aña bieu.
Kico ta nifica Quemar el Viejo
Kimamento di e popchi aki mey anochi dia 31 di december, segun e tradicion ta un ritual di purificacion pa aleha mala suerte of energianan negativo di e periodo cu ta cabando, mescos cu e transicion cual tambe ta celebra e yegada di e aña nobo, aboliendo esun anterior.
E ritual di candela ta representa e supresion di loke a pasa pa permiti un regeneracion di tempo y di energia y spera e aña nobo renoba.
Algo cu ta hopi nobo y cu no tur hende sa ta cu e kimamento di e aña bieu, ta bin compaña cu lectura di un testament, e discurso aki ta completamente basa riba anecdotanan biba pa e propio hendenan. Esaki ta corda nos na Kimamento di Momo, unda cu prome cu kim’e, ta lesa su testament y declaracion pa e proximo aña carnavalesco.
E kimamento di e popchi, ya ta considera como un atractivo espectaculo sentimental na varios pais di Latino America, representando morto di e aña bieu cu ta bay pa duna e ricibimento na esun nobo cu ta drenta.
