Aunke tin un ordo di Mando Policial (Korps Mededeling) for di hopi aña caba cu ta prohibi pa persigui motociclistanan pasobra e ta masha peligroso, toch e Polis Raydal Wester, conoci como “Wewe Chikito” a opta pa neglisha e ordo y start un persecucion dialuna marduga. E persecucion a trece trafico na peliger y na final e motociclista, den su ansha pa core y purba scapa di Polis, a bay dal den un auto y a resulta gravemente herida. Famia awo ta culpa e Polis aki di a causa daño ireparabel na nan ser keri.
Claro cu e miho conseho ta pa respeta ordo di Polis. Coremento pa Polis no ta un acto corecto no tampoco aceptabel. Di otro banda, teniendo cuenta cu entretanto tin 80 mil vehiculo participando activamente den nos trafico, ta imposibel pa Polis maniobra den e trafico pisa di nos isla pa core tras di un scooter. Claro cu tin excepcion, si e motociclista a caba di huy di prizon, a caba di mata un hende of a atraca un banco. Pero djis pa check papelnan si e scooter no lo hustifica tal acto!
E patruya di Polis a start un persecucion diadomingo anochi manece dialuna marduga for di rotonde di Tarabana na Dakota te na e rotonde nobo na Sero Patrishi. Ey e motociclista a dal riba un auto y a malogra su mes masha pisa.
Bisiñanan ta insisti di a mira con e Polis en cuestion ainda a maltrata e herido eybou durante e proceso pa purba boei e, aunke e tabata mal herida cu varios fractura na diferente parti di su curpa.
Un rato pasa Altocomisario Andrew Hoo, bou presion di reaccion negativo di publico a laga sa cu a start un investigacion relaciona cu e incidente na rotonde Sero Patrishi.
“Nos a tuma notariba rednan social di e disgusto y reacionnan negativo y rumornan coriendo rond tocante un incidente cu a tuma luga recientemente na rotonde di Sero Patrishi. Na e momentonan aki ainda investigacion ta tumando lugadi parti di nos di Cuerpo Policial. Comunidad por keda trankil cu nos tin nos agentenan policial profesional cu ta haciendo e investigacion aki“, asina Altocomisario Andrew Hoo a comunica na comunidad.
