Autoridad ta haciendo un investigacion riguroso despues cu na e sitio di accidente fatal na Shaba, a haya bastante municion (bala cayente). Ta trata di municion di un pistol 9mm. Ora cu a haya e balanan cayente a avisa recherche mesora pa cay aden. Esey nifica cu tin dos investigacion andando awor aki: Uno dirigi riba origen di e accidente y otro dirigi riba e balanan cayente cu a haya riba caminda!
Ta calcula cu den total a topa cu no menos di nuebe bala cayente. A topa tambe cu un pieza di un pistol, ta sospecha di ta pieza di un Glock. A confisca tur esaki den cuadro di e investigacion penal cu a cuminsa. A descubri e municionnan cerca di e victima pasahero di e auto.
Den e caso aki no por bisa exactamente di ken e balanan tabata. Tres persona ta envolvi den e accidente di cual dos a fayece. Awor aki autoridad ta buscando tambe algun imagen di e accidente. Aunke nan tin un idea con e accidente a sosode, tog nan kier haya algun imagen di cualkier camara di seguridad cu por confirma 100% nan investigacion.
Notabel tabata e amistadnan cu tabata na e sitio ora cu Polis a yega. Ta sospecha awor cu tin di e “amigonan” cu a yega mesora na e sitio cu a coy sea e arma di candela of mas bala cayente cu tabata benta riba caminda. Tur esaki ta tarea cu recherche tin pa investiga y confirma cu prueba kico a sosode.
