No ta un sekreto ku Kòrsou ta keda konfrontá tur dia di nobo ku diferente retonan den e kadena hudisial. Organonan manera Kuerpo Polisial Kòrsou, Prizòn SDKK, JJIC, Korte Komun di Hustisia i Ministerio Públiko ta algun ehèmpel ku praktikamente diariamente ta blanko di kritiká fuerte.

Pa loke ta e retonan pafó di kuerpo o sea den nos komunidat tin e persepshon kaminda na diferente okashon e perturbador di e delito ta haña “free way” kontrali na e víktima ku sí ta keda mas perhudiká sin por haña e atenshon debido i kontinuo.

Tambe e regularidat ku diferente situashon ta keda ripití den nos sosiedat manera e entrada di indokumentadonan (trafikashon di hende), oumento di arma bou di nos hóbennan, kantidat di droga ku ta drenta via nos frontera marítimo, huidanan for di diferente institushon, agreshon físiko i verbal, violashon di menornan di edat, integridat di kuerpo, integridat di empleadonan públiko, prezunan ku ta sali ku banchi i ta bolbe kometé krimen djis pa menshoná algun ta yuda krea e impreshon ku tin un impotensia pa loke trata e forma di kòntròl ku mester bini dilanti i kon e pasonan mester keda ehekutá pa atendé ku situashonnan aki efektivamente. E diferente puntonan ariba menshoná huntu ku e situashon lamentabel pero real ku algun miembro di kuerpo uniformá ta konfrontando pa loke ta trata nan komportashon desviante ya pa algun tempu kaba tambe ta kontribuí na krea hopi konfushon i diskushon rondó di norma i balor i e sentido di falta di un maneho rígido pa ku toma di desishonnan i akshonnan kreando diskrepansia den prosedernan ku mester wòrdu enkaminá debidamente den e kadena hudisial. Tur e puntonan aki kombiná ta kousa preokupashon i ta tacha kredibilidat den nos kadena hudisial ku tin e tarea kardinal pa traha riba kombatimentu di kriminalidat i violensia i mantenshon di orden públiko.

Sifranan di kriminalidat ku minister a presentá resientemente ta mustra ku tantu atrakonan komo asesinatonan a baha pero e persepshon ku ta reina den nos sosiedat di esakinan ta otro. Ekspreshonnan ku nos ta tuma nota di nan diariamente ta impliká ku e sentido di seguridat bou di siudadanonan a baha i e konfiansa pa ku e responsabilidat i kontribushon di e órganonan konserní, uitvoeringsorganen, manera Kuerpo Polisial di Kòrsou, Ministerio Públiko, Prizòn SDKK, Warda Kosta i hasta Korte Komun di Hustisia ta preokupante.

Apesar di e retonan elevá den e mundu kriminal i e diskrepansianan konfrontá diariamente e agentenan di e diferente kuerponan uniformá ku un sentido di responsabilidat haltu ta sigui enfoká riba nan disponibilidat i kumplimentu ku nan tarea primordial pa duna e asistensia rekerí na nos siudadanonan i mantené orden i trankilidat kaminda ta nesesario.

Na diferente okashon minister a referí ku tin  i of ta traha ku e plan di maneho stratégiko 2019-2020, plan di maneho pa kombatimentu i prevenshon i tambe e plan di kriminalidat hubenil. Ounke ta referí na esakinan lamentablemente e realidat ta reflehá otro den bista di nos komunidat.

Pa haña un bista mas kla di e totalidat i tambe pa komo Parlamentario kontribuí i aportá responsabelmente i efisientemente na atendementu di e retonan ya menshoná suskrito ta hasi uso di artikulo 96 di Reglamentu di Orden di Parlamento pa hasi minister e siguiente petishonnan i preguntanan.

Minister por a fasilitá Parlamento e siguiente dokumentonan?

  1. Plan di Maneho Stategiko 2016-2020 (Strategisch’ beleidplan 2016-2020);
  2. Plan di Maneho di Kombatimentu i Prevenshon (Beleidsplan Bestrijding en Preventie);
  3. Plan di Maneho pa Kriminalidat Hubenil (Beleidsplan Jeugdcriminaliteit);
  4. Plan di Maneho di Mantenshon di lei i resosialisashon (Beleidsplan Rechtshandhaving en Resocialisatie)
  5. Plan di Maneho di Seguridat ICT (Plan Veiligheid ICT);
  6. Areglo den kuadro di e Maneho konhunto di ICT kadena di ‘rechtshandhaving (de onderlinge regeling’ t.b.v. het gezamelijk beheer van de ICT rechthandhavingketen)
  7. E kuadro finansiero di mas aña pa e periodo di aña 2016-2019 i despues di Korte Komun di Hustisia, Prokurador General i ‘Raad voor de Rechtshandhaving (Meerjarig Financieel kader voor de jaren 2016-2019 van het Gemeenschappelijke Hof van Justitie, Parket Procureur Generaal en de Raad voor de Rechtshandhaving en daarna);
  8. Plan pa atendé ku trafikashon di hende 2017-2021(Plan van aanpak van mensenhandel 2017-2021).
  9. Plan di Inrichting di Kuerpo Polisial di Kòrsou revisá (Herziene Inrichtingsplan KPC)
  10. Plan di Inrichting di Landsrecherche revisá (Herziene Inrichtingsplan van de LR)
  11. Plan di Inrichting di Interpol (Inrichtingsplan van Interpol).
  12. Kódigo di Integridat di empleadonan públiko ku ta laborá na Ministerio di Hustisia di pais Kòrsou

Gustosamente Parlamento ta risibí kontesta riba e siguiente preguntanan.

  1. Minister por informá parlamento ken ta supervisá i manehá e sistema di supervishon elektróniko ET (electronische toezicht), mirando ku prezunan ta sali ku banchi i nan ta kometé krimen?
  2. Minister por indiká kua ròl OM ta hunga den evaluashon di e supervishon elektróniko aki?.
  3. Ken ta karga responsabilidat finansiero pa e mantenshon di e banchinan,
  4. Minister por informá Parlamento si e mantenshon ta sosodé riba un base regular?.
  5. Ken of kua organisashon ta enkargá ku training i o ta responsabel pa e programa di integridat aki?
  6. Minister por konfirmá si ta ta eksistí un ‘Stichting Beheer ICT Rechtshandhaving i tambe relatá kuantu persona ta laborá na e entidat aki aktualmente?.
  7. Entrante 01 mei 2019 OM tin un komishon pa ku trata i trafikashon di hende; Minister por duna un update di e status di e komishon aki?
  8. Ta eksistí un MoU ku otro partnernan pa ku e koperashon riba e tereno di trafikashon di hende?
  9. Minister a  revisá e MoU òf a traha palabrashonnan nobo riba e tópiko aki?
  10. Por a duna  informashon riba esaki of suministrá Parlamento un kopia di e MoU aki?
  11. Minister por indiká si a tene reunion ku Prokuradó General (PG’s) durante e último 2 añanan p’asina optené nan vishon i opservashon enkuanto kombatimentu di kriminalidat na e paisnan den karibe?
  12. Minister por splika kòrtiku den kual ta duna informashon tokante e reportahe di e resultadonan di ‘opsporing’, supervishon I SAR di Warda Kosta

      (de rapportages en resultaten van opsporings, toezicht en SAR van de Kustwacht?

  1. Ta posibel pa Minister suministrá informashon por eskrito tokante e kantidat di reunionnan den kuadro di e ‘driehoeksoverleg’ i ‘vierhoeksoverleg’ teniendo na kuenta e relatonan pa loke ta trata kriminalidat?
  2. Minister por splika of informá si maneho ta keda trahá i o stipulá den e‘driehoeksoverleg’ i ‘vierhoeksoverleg’nan aki?
  3. Minister por duna un update di kon ta pará ku e kuadro finansiero di Crimefonds?
  4. Kiko a hasi entretantu pa ku e kuadro finansiero di Griffiegelden?
  5. Kiko minister por informá parlamento riba e retraso den pago di Korte Komun di Hustisia, Parket di Prokuradó General i ‘Raad voor de Rechtshandhaving’?
  6. Tin un modelo finansiero nobo pa Korte Komun di Hustisia? Si esaki ta e kaso, por duna un splikashon por eskrito di esaki?
  7. Minister por informá Parlamento si tin un kuadro finansiero di mas aña, despues di 2019, pa e entidatnan ariba menshoná?
  8. Na diferente okashon Minister a trese dilanti ku e kadena hudisial mester di sèn pa por garantisá su funshonamentu hopi mas efisiente efikas i duradero.

Kiko ta minister su plan di maneho pa logra haña mas entrada?

  • Minister tin un plan alternativo pa atendé ku eventual desperdisio di plaka?

Kòrsou ta na porta di aña 2020 unda mester por halsa e sentido di konfiansa, seguridat i trankilidat den su kadena hudisial i kita e persepshon negativo rondó di esaki. Konhuntamente e organonan di pais mester traha riba un sentido di responsabilidat haltu pa por yega na solushonnan efisiente i duradero.

Si no atendé debidamente ku e orígen di e problemanan i tambe konsekuentemente ku e maneho i kòntròl esaki lo keda un problema persistente den kuadro di e meta pa kombatimentu di kriminalidat i violensia di nos pais.    Mirando e importansia i e sensibilidat di e situashon ampliamente deskribí suskrito ta konta ku Minister por fasilitá Parlamento e dokumentonan solisitá i kontestá e preguntanan formulá diligentemente mas pronto posibel.

Comments

comments