Ta importante pa hunto yega na regulacion pa piscamento den Parke Marino Aruba

517

Relaciona cu e reciente anuncio di Minister Chris Romero tocante piscamento den Parke Nacional Arikok, awe Fundacion Parke Nacional Aruba (FPNA) a corda tur hende cu na momento di e traspaso di maneho di e Parke Marino Aruba pa FPNA, a delinea un plan di maneho cual lo facilita e proceso transitorio y implementacion di regulacion pa cu e uzo y recreacion den e areanan marino protegi. E plan di maneho a indica cu lo tin un proceso largo unda lo hiba un dialogo cu tur usuario pa hunto yega na un plan di maneho definitivo incluyendo regulacion pa cu e uzo di e Parke Marino Aruba.

Entretanto a cuminsa cu e trayecto importante di dialogo hunto cu tur usuario, incluyendo e piscadonan. E proceso aki a wordo interumpi door di e situacion di Covid-19, pero ta den planning actualmente pa inicia den luna di september proximo. FPNA a hiba un combersacion cu e union di piscadonan, lidera pa Arthur Giel, unda a elabora riba varios topico y sigur a enfatisa cu hunto nos lo yega na un acuerdo mutuo durante e sesionnan programa pa september proximo en adelante.

Tambe a elabora riba e situacion actual unda piscadonan cu jaarpas por drenta Parke Nacional Arikok entre 8:00AM y 5:00PM pa bay pisca na baranca. Ademas, a yega na acuerdo cu lo desaroya un sistema di permiso pa piscado cu ta haci uzo di baranca den Parke Nacional Arikok pa piscamento y asina registra nan den un registro oficial di FPNA a base di criterianan cu lo defini den colaboracion.

FPNA ta spera di por desaroya e sistema aki a corto plaso, pa asina brinda cuidadanonan oportunidad pa eherce e tradicion artisanal aki na un manera sostenibel. Pa mas informacion por tuma contacto libremente cu [email protected]