No lo tin un maneho nobo di tiramento di pisca cu harpoen te asina leu. E planificacion p’esaki tabata pa introducie dia prome di augustus, pero gobierno no tabata por a involucra tur e partidonan interesa den e proceso. Te asina leu, lo extende e maneho di tolerancia actual.
Dia 15 di juli tabatin un reunion cu un grupo di piscado di harpoen, caminda cu Minister Ursell Arends a splica e plannan pa regula piscamento cu harpoen den ley na luga di prohibie por completo. E ta prohibi p’e piscadonan di harpoen den cierto area cerca di e costa zuid y west y un parti di costa nort. Tambe ta prohibi pa tin un harpoen den e zona aki. E posesion di un harpoen den e areanan aki solamente ta permiti si e ta debidamente warda den un boto ora cu ta subi lama of ora cu bin bek fo’i lama. Ta prohibi landa cu un harpoen na costa.
E ley lo bin, pero awor minister kier scucha opinion di e partidonan interesa, manera e piscadonan, pa finalisa e maneho definitivo. E ta spera cu esaki gana apoyo.
