Ta evaluando caso sumario den Corte contra turistanan cu a hinca UTV den lama

19

Diadomingo durante dia un grupo di turista Hulandes Europeo a huur 4 UTV  for di un  car rental y na final di e dia a hinca nan den lama na Malmok. E foto saca dor di testigonan a bay rond y causa basta rabia. Ta di dos grupo di turista cu ta haci esaki. Biaha pasa tabata un otro cu a hinca un Jeep Wrangler den lama na e mesun area.

Segun e turistanan Hulandes, e UTV nan tabata  sushi y pa yuda e doño a dicidi di hinca esaki den lama pa purba entrega e vehiculo mas limpi posibel. Ora e doño di e car rental a haya cierto potretnan cu a bay rond, a atende mesora cu e grupo na momento cu nan a bin entrega e vehiculonan.

E doño a cuestiona nan di loke nan a haci cu e vehiculonan y e reaccion den comunidad local. E turistanan a sinti nan mes culpabel pasobra nan mes a admiti finalmente cu nan no mester a haci e tipo di cosnan aki cu e vehiculo di huur.

E grupo a pidi disculpa pa loke nan a haci na e doño y ademas a pidi disculpa tambe cada uno cu un carta na henter e comunidad di Aruba cu tabata rabia.

Mirando e situacion hasta a yama nan abogado for di Hulanda y e abogado a bisanan pa no paga nada. Mesora e doño a reacciona pasobra e UTVnan ey ta costa hopi placa. Awor un hende mester para responsabel pa e gastonan cu ta cay bou di e doño di e vehiculonan.

Doño di e compania di huur e vehiculonan ta evaluando un caso den Corte mesora via un kortgeding si awe dialuna no bin un contesta ken ta paga e gasto nan. E kier pa e turistanan paga cierto suma pa e acto cu lo causa daño na e vehiculonan den futuro pa motibo di salpeter.