Ta demanda ayudo psikiatrico pa hoben cu a viola un dama y maltrata su mesun mama

3635

Kico ta bay sosode cu Matheo C. di 17 aña, acusa di violacion di un hende muhe hopi mas grandi cu ne, lo haya sa diabierna dia 5 di juni. E hoben a presenta pa dos acusacion, di cual esun mas serio ta violacion cometi dia 19 di September 2019 di un hende muhe di 35 aña di edad y e otro acusacion ta maltrato di su mesun mama na juli 2019.

Mirando su comportacion den pasado y e caracter agresivo cu e ta demostra, a pidi pa laga un psikiatra evalu’e. Na final a conclui cu e no ta responsabel pa su actonan. Esaki ta trece otro problema cu ne. E acusacionnan mes ta mustra cu e acusado aki, cu edad relativamente hoben, mester tin un problema mental, cu ta bira pio ora uza droga.

Mester bisa si cu e acusado ta desmenti totalmente e version di e señora victima cu a denunci’e. E denunciante a keha cu e hoben a fors’e tene relacion sexual. Di e sucedido mes no tin testigo, ta solamente version di e victima y e acusado y cada un ta para riba nan punto.

Fiscal di Ministerio Publico tabata di acuerdo cu un tratamento Psiciatrico. E tambe ta convenci cu e mucha homber aki mester di un tratamento, interna den un instituto, pero cu aki na Aruba no tin. Esaki ta algo cu e propio acusado no ta di acuerdo cu ne y a expres’e tambe durante tratamento di su caso.

Fiscal a bisa tambe cu comportacion di e acusado ta ilustra loke ta para den e rapport psiciatrico y ta haci cu e hoben mester haya ayudo. Pero na Aruba no tin e tipo di ayudo aki. E posibilidadnan ta Corsou of Hulanda. Mester intern’e pa un aña y despues haci un evaluacion pa mira cua ta e siguiente paso.

Abogadonan ta sali for di punto di bista cu e acusacion di violacion no ta proba pero ta bisa na mesun momento cu nan cliente no ta hayando ni ayudo ni tratamento actualmente pa su agresividad den KIA. Ta un decision dificil cu Hues mester tuma awo, memey di e retonan di Coronavirus. Pero dia 5 di juni lo haya sa su decision.