Ta cuestiona control y verificacion di odontologia na Aruba

4633

Den un carta oficial dirigi na Aruba dental Society, na IVA y na AZV, e conocido dentista Hendrik Marsman ta cuestiona ken of con ta controla e veracidad di diploma y experiencia di supuesto odontologonan cu ta bin establece na Aruba. Ta core duna nan permiso pa practica, compitiendo contra dentistanan yiu di tera, sin cu e stranheronan tin e preparacion cu ta pretende di tin. Tampoco ta controla si a yega di keha nan, castiganan y persiguinan pa erornan grave den nan trabou.

Por lo menos awor ta cuestionando veracidad di e preparacion di Abd Al Hadi Kawaiah, cu ta practicando como specialista na Aruba, siendo e no ta. A verifica cu Canada, unda supuestamente el a studia, cu a confirma cu e dentista di Algeria, cu a haci su estudio di bachelor di “tandheelkundige” a sigui un curso na Universidad di Toulouse Sabatier III (e ta menciona den su face book postgraduate, no master) a drenta Aruba y logra registra su mes como specialista (orthodontist) y tin contract cu AZV y ta cobra Afl. 650.000,- pa aña y tambe na companianan di seguro particular cobrando tarifa di specialista.

Pa haya un permiso di trabou na Aruba bo mester viseer bo diploma prome na DVG como dentista (LUT/MB) of como specialista medico (LUG) y despues bo por haya permiso pa practica medicina. “Ta bon pa haya sa cua e tin na Aruba, si ta pa specialista e ta parse invalido dor cu e no ta orthodontist y Gobierno no a actua a base di ley. Ta cua papel el a presenta na IVA pa viseer su diploma? A viseer of keda sin Viseer su diploma? A haya tur e tuchtzaak uitspraak? Asina mes a lag’e traha na Aruba? Un caminda den gobierno nan a pifia cu no ta actuando y cera su praktijk y sac’e for di Aruba. Tin miedo cu e ta start un caso contra gobierno. Ken ta responsabel? Ex-Minister Schwengle y Jerry Staring? Pakico Minister Dangui Oduber y IVA no ta actua?”, asina dentista Hendrik Marsman ta cuestionando.

Pa esunnan cu no sa e diferencia den tandarts, kaakchirurg y orthodontist aki un splicacion:

Un estudio pa tandarts na Hulanda bo mester VWO y 5 aña di estudio. Bo ta haya bo bachelor despues di 2 aña y master despues di 3 aña (drs) cu e titulo di tandarts. Na Sur America tin diferente colegio y universidad y bo por drenta cu MAVO of HAVO of VWO y despues di 4 aña bo tin bo bachelor. Cu esaki bo por pasa examen na Aruba (tin 5 aña no tin examen) y bo ta haya e titulo di “tandheelkundige”. Esaki no ta dunabo derecho riba e titulo di tandarts, cu ta solamente pa Drs. Tandheelkunde di Hulanda.

Tempo Booshi Wever tabata Minister el a logra cu su yiu por a studia cu LTS opleiding pa dentista na Cuba, por ehempel. Nada personal, pero como ilustracion con cos ta aki otro cu na Hulanda, segun dr. Marsman. E grupo aki hopi bes tin un curriculum limita y no a haya preparacion pa ranca verstandskies complica, opera carni di djente of rootcanal den molar of reconstruccion complica. Den practica na Aruba nan por haci tur cos despues di nan supuesto estudio.

Pero boso por lesa e bachelor di Algeria su nivel den e uitspraak na Canada: Falta conocemento di diagnostica y procedura y esey na edad di 54 aña. (El a nace na 1960)

Pa specialista nos ley conoce solamente 2 variante.

A)      Kaakchirurg cu ta na Hulanda y Europa 6 aña medicina, despues cu bo a caba dentista y mas 4 aña kaakchirurg y wetenschappelijk onderzoek. Pues un kaakchirurg ta un dentista (6 aña), un dokter (6 aña) 2-3 aña wetenschappelijk onderzoek y promoveer (PHD) mas 4 aña opleiding kaakchirurg.

B)      Orthodontist: Bo ta haci despues di 6 aña dentista, 2-3 aña wetenschappelijk onderzoek y promoveer (PHD)y start estudio di 4 aña como orthodontist. E ora bo tin e titulo y bo ta master den orthodontics. Dentista por haci (postgraduate) curso di beugel di 1-2 aña pa siña traha cu beugel, mescos cu implante, sigui cursonan tur aña etc. Esaki no ta haci un dentista un kaakchirurg of orthodontist.

Na Canada e dentista aki a hay’e cu diferente caso na tuchtcollege y a perde 2 caso den hogerberoep, confirmando e casonan. “El a fraudeer cu falsifica firma di pashent, haya reprimande pa presenta como orthodontista (locual e no ta) y despues di a perde e hoger beroep na aña 2016 a bin traha na Aruba cerca Dr. Walker cu contract di AZV. Despues di 3-4 luna dr. Walker a stop di traha na su clinica dor di su prestacion clinico.

Na Aruba parse ta tin 3 keho contra di dje y un a bay tucht college y resulta den un tuchtuitspraak contra dje. Na Canada e tabatin den un solo caso 17 encargo contra dje cu boetnan halto (riba 10 mil dollar) y a suspend’e durante 4 luna. Den e veredicto ta mustra cu e no tin spijt/remorse di su actonan y ta gañado. Na Aruba ta presenta su mes como orthodontista y tambe tin un scol di “orthodontics”.

Segun dr. Hendrik Marsman, ta mustra cu IVA na Aruba aparentemente no sa di esaki y cu e ta trahando ilegal como specialista. Si acaso el a haya un permiso mes, lo ta bao Minister Schwengle y DVG. Su permiso parse a vence y parse cu no tin un prolongacion oficial, pues ta trahando sin un LUG of MB. “Cu e tuchtzaak uitspraak na Aruba y cu locual mi ta trece padilanti aki mi kier sa si e por keda traha y cu IVA ta lag’e practica toch y kico AZV ta bay haci awor. Cual ta su credencialnan cu e por habri un school of orthodontics na Aruba? E mes no ta orthodontist na 2015 y unda e scol di dje ta registra te pa daña nomber di Aruba”, asina dr. Marsman ta denuncia.

Mas leu e ta bisa “Na aña 2015 el a haya veredicto cu su nivel di diagnostico y procedura ta hopi bao nivel como dentista y mester nascholing. Na 2016 el a bin traha na Aruba como specialista. Mester lag’e sigui traha na Aruba? Cu e record aki di tuchtzaken? Cu ta falsifica patienten dossiers? Cu aparentemente no a meld na IVA y AZV su tuchtzaaknan, gaña den formulario/aanmelding? Cu ultimamente na Canada dilanti Corte ta resulta cu e no ta un specialista? IVA mester cera su praktijk pa e salvaguadia e pueblo? AZV mester paga tarifa di specialista na un persona cu no ta specialista y cu a comete fraude? Ta cua permiso e tin? Di LUT cu un MB como dentista pa despues DIMAS dun’e werkvergunning? Di LUG (di specialista medico) permiso como orthodontist y despues DIMAS dun’e werkvergunning? Parse cu Gobierno di Aruba a actua sin base legal di ley y mester awor claridad”, asina dentista Hendrik Marsman a termina bisando.