Ta cambia nomber di Sasakiweg pa Avenida Nelson Oduber

Minister Otmar Oduber, encarga cu Ministerio di desaroyo teritorial, infrastructura y medio ambiente a anuncia recientemente cu otro siman, esta dialuna 19 di augustus, lo inaugura Avenida Nelson Orlando Oduber, unda awor aki nos conoce como Sasakiweg. Ta e mesun caminda principal cu na augustus 2018, e conocido Clyde Harms a manda propone na “Straatnamencommissie” pa cambia Sasakiweg pa Oscar Henriquez Boulevard.

Aña pasa Clyde Harms a skirbi ainda cu Oscar Henriquez, cu e tempo ey a caba di fayece, tabata un Arubiano multifacetico cu a destaca como deportista, empresario, politico y gobernante. Como deportista e tabata conoci como esgrimista, futbolista y tenista. Como lider den deporte Oscar Henriquez a contribui hopi den directiva di varios “bond” deportivo, manera ABBA-Amateur Baseball Bond Aruba y como presidente di ASU – Arubaanse Sport Unie. Como empresario el a funda Pelican Tours cu ta un di e grandinan di Aruba. Como politico y gobernante el a laga un legado di exito specialmente den turismo. Oscar Henriquez y Juan Enrique “Juancho” Yrausquin tabata esunnan cu a planta e mata di turismo cu awe ta duna su frutonan como e pilar mas importante di nos economia.

No tin duda cu e aporte di Oscar na Aruba ta enorme. Pero Oscar a haya e reconocemento cu e merece di Aruba? Ningun stadion, ningun caya, ningun edificio ta carga su nomber, asina Clyde Harms a skirbi den un relato cu el a manda tambe pa e comision encarga pa destina nombernan di caya riba nos isla.

Sinembargo, Minister Otmar Oduber, a organisa den nomber di henter Gabinete Wever-Croes un evento special dialuna awor na cuminsamento di Sasakiweg, unda antes tabatin luz di trafico y awor tin e rotonde nobo na Guardian Group.

Nelson Orlando Oduber di 71 aña di edad ta lider honorario di Partido Movimiento Electoral di Pueblo (MEP). El a integra den e partido na aña 1975. El a bira Minister Presidente pa prome biaha na aña 1989 y a keda den funcion te 1994. Na aña 2001 el a bira minister Presidente pa di dos biaha y a bolbe gana eleccion, aunke perdiendo asiento na 2005, pero a sigui goberna pa di tres termino como Prome Minister. Prome cune Henny Eman (AVP) tabata Minister Presidente y despues di dje a bira Mike Eman (AVP). E ta casa cu Glenda Oduber-Croes y ta tata di Glenson, Danguillaume y Nelson Jr.

Opinion di Partido MEP

Recientemente Gabinete Wever-Croes a dicidi pa nombra Sasakiweg comoAvenida Nelson Orlando Oduber”. Sin duda cu esaki ta un bunita reconocemento na un gran politico y gobernante, Nelson Oduber cu a sirbi nos pais pa mas di 35 aña, tanto como Diputado, Parlamentario y Minister Presidente.

Tabata ex diputado Nelson Orlando Oduber cu a percura na 1983 pa introduci e plan di infrastructura turistico, “Plan Sasaki”, caminda a percura pa desaroya mas di 100 hectar di tereno pa construi facilidadnan turistico y cual plan a encera entre otro construccion di varios caretera nobo, entre otro e caretera principal for di Eagle te Malmok, conoci como Sasakiweg.

E vision di sr. Nelson Oduber e tempo ey a resulta uno corecto y specialmente na momento cu refineria Lago a cera su portanan na 1985 y cu nos pais a dicidi di concentra riba desaroyo di e industria turistico, cu a lo largo a bira e pilar economico solido di nos pais. Debi na e Plan Sasaki aki den transcurso di añanan un cantidad di hotel, condominio, shopping mall, cinema, restaurant, supermarket, night club y otro actividadnan recreativo a ser desaroya den e area turistico aki

Mirando e hecho cu pa 35 aña largo e asina yama den boca di pueblo “Sasakiwegnunca a haya un nomber oficial di Gobierno, awor ta e momento propicio pa nombra e caretera principal aki na nomber di e gran Arubiano Nelson Orlando Oduber.

Partido MEP ta gradici Gobierno di Aruba pa e decision aki y ta felicita Nelson Oduber y famia cu e reconocemento bon mereci aki.