Minister di Husticia, mr. Andin Bikker ta haya cu den criminalidad tin un otro dimension cu ta e aspecto social. Pa cu esaki, lo bay introduci e ley pa asistencia di reorganisacion di debe. Segun e mandatario, loke ta pasando cu ta cu tin 40% plus di e poblacion cu ta bibando bou di bestaands minimo cu ta pone cu nan ta cay den spiraal di debe. Hopi biaha si mira e estadistica, ta personanan cu pa falta di entrada y/of situacion social hopi decadente ta cay den tentacion y ta bay over na criminalidad. Segun Minister Bikker, si kier combati criminalidad mester preveni recidivismo cu ta personanan cu ta cay bek den criminalidad haciendo atraco entre otro na luganan di bende loteria. E personanan aki ta cay den detencion, ta bay cera na KIA y despues di dos aña nan ta sali y apenas den un par di siman nan ta comete cualkier atraco. E tipo di actonan aki mester para nan. E personanan aki mester por haya guia na un facilidad correccional. Manera ta conoci dos siman pasa Minister di Husticia tabata di bishita na KIA unda e por a mira cu e prizon ta den un estado deteriora. Como gobierno lo bay haci compromiso pa construi un facilidad correccional nobo. No solamente un facilidad nobo, pero tambe cu ta duna contenido na e palabra correccional segun Minister Bikker. E persona cu bay den e correccional mester ser reeduca y cu nan por haya un chens bek pa integra na un manera decente y responsabel den comunidad. Awor aki e situacion ta manera un draaideur. Un persona cu ta deteni ta haya un castigo y despues di un of dos aña ta bolbe cay den tentacion den un siman of un luna y ta bolbe comete atraco.
