Sindicato SIMAR a reuni cu diferente fraccion den Parlamento caminda varios sindicato tabata tey presente. For di oranan di merdia SIMAR lo a yama e reunion aki cu caracter di urgencia.
Josephine Albertus, presidente di e sindicato a indica cu for di dialuna caba e inkietudnan a cuminsa lanta bek ariba.
Nan a wordo yama door di nan coleganan di Prins Bernhardschool. Despues di esey pa e coleganan di Colegio San Nicolas.
Tambe tabata wordo yama pa e coleganan di Scol Paso pa Futuro. SIMAR tabata tin siman pasa reunion cu minister di enseñansa, pero te ainda nan no a ricibi preto riba blanco riba e parti cu nan no lo muda.
Diaranson nan a ricibi un carta. Riba esey tambe nan tabata tin cierto puntonan caminda cu no tabata tin un fecha data tal dia of nunca mas nan no lo wordo muda.
Por ta pa otro aña por bin cu e scol por muda. Tambe por bisa cu dialuna, ora cu a wordo acerca pa e docentenan di Prins Bernhard riba e parti cu e cabesante a wordo yama y bisa cu e scol lo tin cu cera toch. Cu e scol lo bay cay bao di Soasa.
SIMAR ta lamenta di tende riba rednan social cu minister a bin cu su rueda di prensa, unda cu e ta bisa cu tabata trata aki di un eror humano. Si e ta un eror humano, cu por pasa, pero e ora bo no ta bay tapa e eror humano. Bo ta bay trece claridad.
E minister a vocifera cu el a tuma contacto cu SIMAR. E presidente a mustra cu ningun momento a tuma contacto cu SIMAR. Den ningun momento e minister a manda un carta.
Te awe ainda SIMAR no a ricibi un carta unda cu ta bisa cu ta trata di un eror humano. Door di e docentenan di Prins Bernhardschool a tuma contacto cu SIMAR dialuna, a palabra cu diamars mainta lo a bay na e scol pa papia cu e docentenan y e cabesante. Eynan a haya clarificacion di kico a pasa dialuna atardi cu e cabesante a haya un reunion cu e directora interino di DPS unda cu a informa cu dia 3 di juli mester entrega e yabi y scol lo cera toch y otro aña lo cay bao di Soasa.
Diamars despues cu a papia cu e docentenan, SIMAR a indica cu nan lo ta proactivo. A tuma contacto cu e minister puntre kico ta pasando. E momento ey e minister a bisa cu ta trata aki di un eror humano
Te ayera ainda, a puntra bureau di minister ora cu a ricibi e carta di Paso pa Futuro, unda e carta di Prins Bernhard ta. A bisa cu no tin nada ainda. SIMAR ta lamenta di tende cu minister ta papia di eror humano, pero den ningun momento a purba di trece claridad riba e eror humano aki.
A purba hustamente di tap’e. Por bisa cu siman pasa diamars, ora cu e scol a ricibi e carta, e carta a bay cu bode special na Prins Bernhard ora cu e cabesante mester a firma e ontvangst pa esaki. Si ta un eror humano, dicon a manda un carta e ora ey di rectificacion.
Si wak riba e parti di Colegio San Nicolas, siman pasa, dia 18 di juni, Minister mes a bisa den un di su sesionnan live, cu e ta honra e maestronan di Colegio San Nicolas nan peticion y e ta trek in e MB.
Ayera, diaranson, nan ta ricibi un carta y den e carta ta bisa cu a trek in un parti di un frase den e MB. Esey no tabata loke a palabra. Siman pasa ora cu a ricibi e informacion, tabata tin un reunion cu veld di enseñansa y tabata contento di por a vocifera cu e MB a wordo ingetrokken y lo cuminsa for di base cu e docentenan pa traha bay dilanti, pa por sigui cu innovacion.
Segun Albertus, ta lamentabel y sin respet pa wak cu minister kier culpa SIMAR pa e inkietud, disgusto y frustracion cu tin enseñansa. E minister ta bay asina leu door di bisa cu e no ta e problema cu SIMAR tin cu enseñansa pero ta cu e gabinete Wever-Croes.
SIMAR kier a indica y a bisa awe nochi, cu e problema cu SIMAR tin, ta e disgusto y e frustracion cu minister di enseñansa ta trece den veld di enseñansa. E scolnan ta acerca e sindicato. Ta deber como sindicato pa nan por bay sinta, dialoga pa nan y trece claridad. Pero ta lamentabel pa wak cu ta haya papel preto riba blanco. Loke ta skirbi no ta wordo honra. Ta duna palabracionnan cu no ta bisa solamente a duna na SIMAR. A dun’e riba e sesionnan live cu full Aruba por a scuch’e y atrobe no ta honra nan, ta bin cu algo otro. No ta husto y e ta un falta di respet, segun Albertus. Minister a bisa cu e docentenan ta profesional, nan ta bon educa. Y si ta asina, nan mester ta tambe humano y profesional pa si ta un fout humano manera minister a bisa, rectifik’e na moda cu mester y no purba di tap’e y sconde, pa e ora ningun hende no sa.
SIMAR kier claridad pa e maestronan y ta lamenta pa wak cu e no tey ainda. Den e reunion cu e miembronan, Simar a mustra cu dato y base, cu loke ta wordo vocifera door di minister no ta corecto y conhuntamente a dicidi cu dialuna atardi 3’or, lo tin un marcha pa mustra e disgusto cu tin, pasobra nan ta bisa ta Basta. Na ex-DOW lo reuni cu veld di enseñansa pa nan tin nan marca. E docentenan a vocifera cu nan kier e mayornan tambe sali cu nan.
Ta purba, ta dialoga, ta purba cu carta, pero e minister no ta honra nan. E ora ey, no ta husto, segun Albertus. Simar kier dialoga, pero cu confiansa. No kier dialoga unda ta bisa cu palabracionnan cu ta wordo haci, no ta wordo honra. Cosnan cu ta wordo buta preto riba blanco no ta honra. Semper e meta di Simar ta dialogo, pasobra esey ta e meta di un sindicato. Pero mester bisa si cu e minister mester ta honesto y duna e claridad.
A haya e mandato cu lo bay bin cu un marcha pasobra e docentenan a bisa ta Basta.
