Ta amplia training di badminton pa hobenan

Como parti di su meta pa promove y desaroya e deporte di badminton, Aruba Badminton a bin ta amplia su trainingnan pa diferente edad. E trainingnan ta insera na prome luga cu ta splica e reglanan di e deporte y enfoca riba e tecnicanan basico pa por practica badminton. Despues ta sigui cu drecha e condicion fysico di e deportistanan y tambe mehora nan tactica pa cu e deporte. Y por ultimo e deportistanan ta wordo stimula pa participa na torneonan local y internacional p’asina sigui desaroya e parti competitivo di badminton.

Te cu awo e acogida tabata tremendo e aña ‘ki cu participacion di un grupo grandi di hoben na e olympiada escolar y na torneonan na Cuba y Colombia. Y luna pasa esaki a sigui cu participacion di 6 atleta na e VI Guatemala International den e categoria di juniors como tambe di seniors.

E exitonan aki a crea si un peticion adicional pa Aruba Badminton sigui amplia su training pa e hobenan. Y cu hopi placer por menciona awo cu esaki ta bay sosode, iniciando dia 16 di oktober venidero.

E training pa e hobenan lo bay consisti di diferente nivel, caminda lo tin un training separa pa muchanan cu actualmente ta riba un nivel basico y un training pa hobenan cu ta mas avansa. Asina por dedica mas atencion na cada hoben y alaves na un nivel na cual e por sigui desaroya su mes na un manera placentero.

Training di Aruba Badminton ta tuma luga na Centro Deportivo Playa (Gymzaal di Colegio Arubano) y ta como lo siguiente.

Diamars 8.00 pm – 9.30 pm tur edad

Diaranson 5.30 pm – 7.00 pm edadnan te cu 18 aña (basico y avansa)

Diahuebs 8.00 pm – 9.30 pm tur edad

Diasabra 9.00 am – 10.30 am edadnan te u 18 aña (basico y avansa)

Tur esnan interesa por bishita e Facebook di Badminton Aruba, por tuma contacto cu Su Ying Lau na 5635333 of por pasa libremente na Centro Deportivo Playa riba un di e dianan di training.