Ta acus’e di menasa: Richi Danies encarcela keto bay

Diabierna anochi Polisnan a detene no menos di 9 manifestante dilanti edificio di Parlamento di Aruba. Ocho di nan a keda deteni debi cu tabata stroba trabou di Polis of pa orden publico. A cera nan na varios Warda di Polis y despues di algun ora a recobra nan libertad. Reginald Danies si no a core e mesun suerte!

Ministerio Publico a confirma awe cu e organisado principal di e di dos manifestacion diabierna atardi ta cera keto bay. Mañan dialuna e lo mester mira un Fiscal y Hues Comisario pa mira si lo prolonga su detencion of si e por sali liber. 

Con Danies a menasa of ken el a menasa no ta conoci pa nos. Si ta asina cu durante entrevista live dilanti Parlamento diabierna anochi el a bisa di lo no move di eydilanti. Tambe el a subraya cu si mester move toch, lo tin candela tur rond di Aruba, el a adverti for di adelanta caba. Mester bisa cu despues di su detencion no tabatin ningun candela ni disturbio. 

Hecho ta, cu no por kita for di dje, cu Richi Danies tabata practicamente su so den e lucha contra abuso di mucha na un principio. El a spuit henter Aruba cu mensahe di “Aruba Pro Pedofiel” pa hala atencion di Gobierno y lanta comunidad for di soño. Despues di algun aña di lucha y bay cera tambe den e proceso, awo porfin Parlamento a haya e mensahe cu mayoria den pueblo no ta aproba e leynan vigente, ni despues di siman pasa cu a iguala nan cu esun di Corsou. 

Pero, awo cu el a yama un manifestacion masal, mas grupo tambe a organisa manifestacion riba e mesun dia. E realidad ta cu mayoria hende a uni na e otro manifestacion y no na esun di Richi Danies. Ni despues ora nan a yega Parlamento y a pidi pa e 12 mil firmantenan yega dilanti Parlamento, ningun hende a haci caso di nan. Pa 10:00pm ora e “deadline” di Polis a yega pa nan move for di eydilanti, tabata un grupo relativamente chikito a keda atras. 

Aunke nos no ta aproba ningun tipo di desobediencia civil, toch mester reconoce cu e lucha pa cambia leynan y pa pueblo ta mas consciente cu tin hopi caso di abuso sexual di mucha, ta algo cu Richi Danies merece tur elogio pe. Awe Husticia ta uza e peso di ley pa persigui’e pasobra el a keda sinta dilanti Parlamento, pero abusadonan keto bay ta haya 20 luna of 3 aña y 8 luna pa abusa sexualmente di muchanan. Na final t’e esey ta su lucha y Parlamentarionan cu a sali pafo pa tuma manifiesto a haya un cori, na su luga! 

Tur tin tres aña ta cobra 8.300 florin pa luna den nan man y ainda no por cambia e leynan di abuso di mucha. E mesun Minister Presidente, cu tin tur poder den su man awo, a priminti cu den 6 minuut e ta cambia leynan, te awe ainda no a haci net net nada. Ricardo Croes (RED) cu a purba dialoga cu e grupo di “Rasta” pafo di Parlamento a haya un cori y grita: “Bay paden, pasobra Bo no a haci Bo trabou!”

De facto, ta esaki ta e sentimiento cu ta biba den pueblo contra Parlamento y Gobierno. Tur ta papia y bisa yen palabra bunita pero ora di cumpli y actua, nada no ta pasa. Ta sinti un determinacion den pueblo pa mustra nan malcontento sin miedo, contra tur politico y gobernante, pa nan sa cu den e siguiente eleccion otro aña lo no acepta ningun hungamento di “mooi weer” riba temanan di importancia manera abuso di mucha!