Diaranson mainta minister mr. Geoffrey Wever conhuntamente cu e coleganan minister di Gabinete AVP-Futuro, Mike Eman, Gerlien Croes, Mervin Wyatt-Ras y. Wendrick Cicilia a haci entrega oficial di e decision di Conseho di Minister, cual ta autorisa SVb pa aumenta e reparatietoeslag pa tur pensionado cu AFL 250,- riba nan cuenta mensual, desde 1 di mei 2025. Ricibi pa director di SVb, Edwin Jacobs, el a declara cu esaki lo ta implementa “a pia de la letra.”
Minister Geoffrey Wever satisfecho cu esfuerso di trabou ta duna resultado inmediato
Segun Ministro di Finansa, Economia y Sector Primario, mr. Geoffrey Wever, “esaki ta un alivio importante y na ora pa nos grandinan.” El a expresa su gratitud na e tur e coleganan cu a haci un esfuerso extraordinario pa e gabinete por a logra presenta e cambionan necesario den e presupuesto cual a sirbi como fundeshi pa por logra e paso importante aki.
“E cambio den presupuesto 2025 no tabata facil, pero danki na e trabou tecnico y dedicacion di nos ekipo, nos por a logra un manera di duna e pueblo un aumento real sin sali foi e cuadro financiero responsabel. Un surplus no ta di ningun gabinete, ni di ningun partido; e ta di e pueblo cu ta traha duro y paga belasting”, Minister Wever a declara firmemente.
Ministro Geoffrey Wever a reitera cu gobierno di Aruba ta compromete pa sigui traha riba e solucionnan cu tin impacto directo riba e bienestar di e pueblo Arubiano. E paso aki ta solamente e comienso di un enfoke integral y sostenibel pa mehora e poder di compra di nos comunidad.
