SVb: Loke tin den fondo di pension di behes por bay pa algun luna mas

Na e momentonan aki Aruba ta bibando un bida extra ordinario. E dinamica ta dificil pa captura y proyecta. Por ta Aruba lo ta saliendo hopi mas lihe cu actividadnan economico di locual cu na prome instante, na luna di maart, a pensa cu lo dura mas hopi. Ya caba ta habriendo den luna di mei pa juni, ta duna SVb e speransa cu contribucionnan pa cu e fondo ta bay aumenta atrobe.

E loonsubsidie tambe ta bay duna contribucion. Segun Ir. Edwin Jacobs, director di SVb, 9 miyon florin lo drenta e fondo di AOV/AWW, pa motibo di e loonsubsidie y cu algun actividad mas e por yega 13 of 14 miyon florin. E gastonan mensual di SVb ta 24 miyon florin. Dia 18 mei tabatin un conteo di likides cual ta mustra cu tin 56 miyon den e fondo di pension di behes y viudo. Den esun di malesa por mira cu tin mas o menos 16 pa 17 miyon.

Ta yega e momento cu e fondo aki tambe lo ta agotando, si e aporte no aumenta, segun Ir. Jacobs. SVb ta premira aworaki cu ta bay tin momentonan cu si no logra sali, tin cu pidi gobierno sosten di likides p’e fondo aki. Si economia mustra via e loonsubsidie di yega 14 miyon, mester uza 12 miyon. E keda asina pa un par di tempo, por tin pa 5 of 6 luna prome cu mester sosten di likides.

SVb a ricibi rapport di maart y ta mustra un bon coleccion, pasobra ainda mita di maart ainda economia a draai. Rapport di april nan no a ricibi ainda y e director di SVb ta kere cu lo dura un tiki. Luna di april tabatin e lockdown, “Shelter in Place”, e servicionan esencial so por a draai. No tin hopi expectativa eynan, a pidi contribucion for di hendenan den salario. Por mira cu 14 mil pa 15 mil trahado a haci peticion pa fase y esey ta nifica cu e trahado no por a contribui cu nada. E expectativa no ta mucho, di cual ta calcula 12 of 13 miyon.

E dinamica di tempo ta haci dificil pa haci un proyeccion, segun Ir. Jacobs. El a haci un calculacion di 5 pa 6 luna si e situacion keda loke a premira na mei di 56 miyon, lo mester pidi likides na gobierno. E recuperacion pa SVb lo ta uno largo y nan a realisa esaki caba. Prome cu e economia yega na e nivel cu e tabata, esta na januari tabata un hopi bon momento. Aña pasa tabata un tremendo aña p’e fondonan, e recuperacion tabata bayendo.

E reserva a crece y a duna SVb un poco alivio aworaki. Tin experto a bisa p’e economia di Aruba bay bek unda tabata lo dura 2 pa 3 aña. Esey ta nifica cu mester cuminsa ful di nobo, si reserva agota lo ta bek na e situacion di 2013 unda cu a keda 5 miyon of 8 miyon den e caha. Ta birando temponan dificil y mester mira kico ta bay haci cu e sistema di pension di behes. Te unda ta e alcance di SVb, ta desea di mantene e trankilidad di e grandinan. SVb ta consciente cu loke un grupo grandi ta haya ta e AOV.