Director di SVb, ing. Edwin Jacobs, tin un bon noticia pa e pensionadonan. E tin di haber cu e reparatietoeslag.
El a comenta cu diabierna anochi, el a haya informacion for di e ministerio di finansas, cu Gobierno a tuma e decision cu no ta ehecuta e ley di reparatietoeslag, manera cu el a wordo cambia anteriormente. Gobierno a dicidi cu tur pensionado ta keda mantene na 125 florin riba e reparatietoeslag.
Jacobs a splica cu ley a introduci tanto na Juli aña pasa, como na Januari di e aña aki, un evaluacion di entrada. Na Juli di aña pasa tambe gobierno a dicidi cu e no ta ehecut’e y na Januari actualmente, tambe a dicidi cu e cambio cu mester a tuma luga dia 1 di Januari, tampoco lo wordo ehecuta.
Si mester warda e cambio di e ley pa por ehecuta. No ta asina, segun Jacobs. Pero si ta asina cu ta permiti cu gobierno por desvia di un ley, semper y cuando cu e ta na beneficio di e ciudadano.
E ta anuncia cu anticipando e cambio di ley cu e ta bay trece den e ley, e lo bay bin cu un maneho beneficioso. Den e caso aki, gobierno a anunci’e tambe. Por a mira diferente anuncio riba medionan social, cu gobierno a informa cu gobierno ta bay mantene e pago di reparatietoeslag, manera cu e tabata dia 1 di Juli, caminda cu tur persona a haya 125 florin.
E siguiente paso mester ta si, cu gobierno ta bay parlamento pa cambia e ley, pa ora e tin e parti legal tambe cubri.
Jacbos a sigui splica cu si para un rato keto na e reparatietoeslag, ki tipo di instrumento e ta.
E ta un instrumento di reparticion di entrada husto. Parti di dje, manera cu por wak con el a wordo aplica pa loke ta e trahadonan, e no a conta pa tur trahado. Tin un evaluacion di entrada di parti di e trahado.
Pa e parti di pensionado, desde cu el a wordo introduci na 2011, tabata tin e discusion con por ehecuta e evaluacion di entrada ey, pa asina evita cu esnan cu tin hopi entrada, lo no mester haya e reparatietoeslag, pasobra no tin mester di dje.
Ademas, ora cu ta bay kita e fondo di un ciudadano cu ta trahado, bo ta kit’e for di dje, por medio di belasting y ta pase pa un otro cu tin mas entrada mes.
E tipo di situacion eynan bo kier evita.
Na 2011, no por a sali afo un bon sistema pa haci’e. Na 2013, gobierno a bolbe purba di bin ora cu el a aumenta e reparatietoeslag, di 50 pa 100 florin, a bin un pensamento pa haci un evaluacion cu e 50 extra ey, ta bay solamente pa un cierto grupo di categoria di entrada.
Na 2012 a bisa gobierno cu no lo ehecut’e asina. Ta mantene 50 extra ey pa tur hende. Bo ta bolbe wak cu na 2018, e pensamento ta bolbe purba. E instrumento aki ta uno di reparticion. Bo mester tin un caminda, un evaluacion di entrada cu no ta tur persona ta hay’e. Tin hende cu no tin mester di dje.
Si bo kier pa tur hende hay’e, ta aumenta e pensioen of ta bin cu un otro tipo di instrumento. E ora ta bolbe wak cu a purba. A purba di yega na un forma pa ehecut’e y no ta facil.
A prepara pa despues di 1 di Februari, pa hopi reclamo y obhecionnan cu lo a drenta na SVb.
Na momento cu bo tin un extra entrada, manera pensioen di APFA, por surpasa e 1132 florin di SVb, e ta keda toch algo dificil. A prepara pa un ehecucion y tambe a prepara pa loke bin despues.
A prepara cu un grupo grandi di ciudadano lo apela na SVb y lo trece hopi trabao administrativo cun’e. A prepara cu extra personal. Awo cu e decision di gobierno cu ta mantene esey, pa SVb tambe ta bin un calma despues di 1 di Februari.
Esaki ta di tres biaha cu SVb ta prepara cambio cu na final no ta wordo ehecuta, segun director di SVb, Edwin Jacobs.
