SVb a aproba pago: Diamars ta paga 43 miyon florin na pensioen + bonus

4947

“E pandemia a pone nos realisa cu bon salud den un rato di ora por cambia den salud delicado, cu un bon trabao por bira cambia den desempleo. E pandemia a pone e ser humano stop di traha riba su soñonan y cuminsa pensa riba con pa sobrebibi. E pandemia a trece den gran mayoria di cas incertidumbre y inseguridad”, asina ir. Edwin Jacobs, director di Banco di Seguro Social, SVb, a informa awe mainta na momento cu el a caba di aproba e transferencia di banco di 43 miyon florin pa paga pensioen y bonus di Pasco na tur cliente di SVb.

E banco di seguro social, SVb, tabatin e previlegio di den e momento dificilnan aki por a sirbi comunidad cu e miho di nan habilidadnan. Bida a permiti cu nan trabao por a suavisa e dolor pa hopi hende.

“Awo aki cu mi ta aprobando e payroll di pensioen pa december mas e bonus, mi pensamento ta bay riba e yamadanan cu mi a ricibi di grandinan na comienso di e pandemia: Edwin te ki tempo nos por sigui cobra pensioen? Bao nos grandinan tambe tabata reina un incertidumbre grandi. Den hopi famia e pensioen di behes tambe a contribui pa sobrevivencia”, asina e director di SVb a admiti. 

Ta interesante menciona e hecho cu SVb a paga pensioen y bonus riba nan mesun forsa, pues sin ayudo ni di gobierno di Aruba y tampoco cu placa di Hulanda. Esey ta demostra e forsa financiero di e banco di seguro social. Aunke cu, e forsa ey no ta pa semper. Si nada no sosode, e banco lo por sigui cubri pensioen sin problema pa 6 luna mas, pero na juni en adelanta lo mester sosode algo. Sea ta cambia e primanan, e condicionnan of ta haci un inyeccion cuantioso den e fondo. E no lo ta facil, pero tampoco imposibel. 

“E caminda di recuperacion ta largo, pero mi tin fe y confiansa, cu nos tur lo pone schoudernan hunto y carga nos pais sac’e padilanti. Pa hopi esey ta un unico soño cu a keda bibo pa awo: e dia cu Aruba ta bek riba pia”, di acuerdo cu ir. Edwin Jacobs. 

Nos grandinan por ta trankil. Dialuna pensioennan ta na banco, diamars nan por cobra. “Cu bida sigui bendiciona nos dushi isla y nos dushi hendenan”, asina Edwin Jacobs a termina bisando.