Diadomingo anochi den stadion Guillermo P. Trinidad SV Britannia y Bubali SC a topa otro den e prome buelta di campeonato di AVB 2018/19.
SV Britannia Pizza Hut a presenta cu un elenco combina entre hobenan y hungdornan di experencia mientras di otro banda Bubali SC a presenta practicamente cu ful un equipo hoben. Tabata bisto den e prome minut di wega SV Britannia tin un dominio ariba Bubali y Pumanan tabata circula e bala bon y continuamente tabata pone e defensa di Bubali den preta. Tabata na di 30 minut di wega cu e hoben David Castro ta bai laga ariba banda drechi y ta drenta pa fusila e keeper di Bubali pa hasi e wega 1-0 pa SV Britannia.
Den un di e poco contra colpinan di Bubali den e 16 meter, Bubali ta sorprende e defensa di Britannia y ta empata e wega 1-1 den pito di haltime. Den di dos tempo SV Britannia Bright Bakery a sali mas desido y pa medio di Walter Rangel e wega ta bira 2-1 pa Britannia y despues ta Daniel Linscheer cu ta hasi e wega 3-1 y na final ta Johnatan Ruiz cu ta hasi e score 4-1 pa Britannia Frisian Flag cu cual score e wega ta caba tambe. Un pabien pa e equipo di Piedra Plat / Paradera, staff y fanatica cu a responde bon den e prome wega. Proximo wega di SV Britannia Total Finance ta diadomingo awor contra di La Fama cual equipo ta un equipo fuerte.
