Diasabra anochi den Compleho Deportivo Guillermo P. Trinidad SV Britannia a topa Dep. Nacional den un wega crusial den e bataya pa clasificacion pa playoff. SV Britannia tabatin mester di un victoria pa por keda den bataya pa clasifica pa playoff final y di otro banda Dep. Nacional mester pone un stempel pa por drenta play off cu un moral mas halto. Ekiponan cu ya a clasifica ta Dakota, Estrella y e propio Dep. Nacional y faltando e ultimo ekipo cu ta un bataya tenas entre SV Britannia, Bubali y RCA. E di cuater puesto tin un diferencia di 1 of dos punto entre e ultimo teamnan menciona.

E wega a cuminsa unda SV Britannia a sali disidido for di prome minuut di wega cu un bon wega di combinacion y mes ora ta pone e defensa di Dep. Nacional den un apuro. Tabata na di 4 minut cu SV Britannia ta anota su prome gol pero ta wordo anula pa motibo di posicion adelanta. Pero SV Britannia a sigui ataca y na di 9 minuut di wega ta duna fruta ora cu Renier Paraez ta anota cu cabez despues di a ricibi un cruse di Coco Estrada y asina e wega ta bira 1-0 pa SV Britannia.

Por a observa cu Dep. Nacional tabata falta di su delantero principal cu ta Kenroy Ranger y di otro banda SV Britannia tambe tabata falta e delantero Shen Pieter.

Tabata na di 21 minuut di wega cu e delantero di Dep. Nacional esta Devis Oliveros ta crusa memey di dos defensa di Britannia y ta anota e gol di empate y asina halftime a bay aden 1-1. Den di dos tempo SV Britannia a bolbe anota un gol y un biaha mas e gol ta wordo anula pa motibo di posicion adelanta. Ta na di 30 minuut di wega Renier Paraez ta wordo benta abou den area chica y corectamente refree ta fluit pinalty pa SV Britannia. Akinan e prinsipal tirado di pinalty di Britannia esta Luis “Coco” Estrada ta tuma e pinalty pa su cuenta pero lamentablemente pa un motibo of otro ta tira riba palo di gol y Dep. Nacional ta scapa di cay atras.

Ta na di 61 minuut di wega SV Britannia ta haya un corner y akinan e bala ta cay den pianan di Sebastian Montoya cu no ta basila y ta fusila e keeper di Nacional pa hasi e wega 2-1 pa su team SV Britannia. Despues di e gol aki Dep. Naconal ta a aumenta e presion riba e porteria di SV Britannia defendi pa Kendrick Dania pero no por a haci mucho cos mas.

Tabata SV Britannia cu por a haci e wega 3-1 pero no por a concretisa y asina e wega ta bin caba cu un victoria importante di SV Britannia ariba Dep. Nacional. Awor SV Britannia tin 31 punto, RCA 28 punto faltando un wega y SC Bubali cu 26 punto pero falta 2 wega pa hunga ainda.

Diaranson awor Dep. Nacional lo topa SC Bubali den un wega crusial pa SC Bubali y di otro banda Dep. Nacional no kier drenta Play off cu otro derota. Diasabra RCA lo topa cu Dakota den un wega crucial tambe unda cu RCA mester di un victoria pa tin chens pa drenta playoff pero un Dakota cu kier sigi pone su stempel ariba RCA di no permiti RCA kibra e moral di Dakota, den e otro wega crucial SV Britannia lo topa cu Bubali unda cu ambos team lo sali busca e 3 puntonan pa por clasifica pa playoff final.

Comments

comments