Susto di su bida: Accidente semi frontal cu tractor na Dakota

2618

Dama a scapa milagrosamente awe, na momento cu el a hay’e envolvi den un accidente semi frontal cu un tractor riba Avenida Milio Croes na Dakota.

Awe den oranan di merdia, aproximadamente 1:00PM, a sosode un accidente riba caminda principal di Dakota caminda un Hyundai  Tucson y un Tractor a topa otro cara cara. E chauffeur di e tractor a splica cu e tabata den pleno trabou, na momento cu e mester a subi caminda pa un breve instante y asina ahusta e posicion di e tractor pero na e crusada el a subi esaki y sin por a spera cu algo lo a bay completamente robes.

Algo lo a pega y e tractor enbes di para, a continua cu e maniobra y a sigui lora sin cu e chauffeur tabata tin ningun tipo di control riba dje. Di direccion contrario tabata acerca e dama na stuur di e Tucson cu no tabata tin ningun idea di locual tabata tumando luga cu e tractor. E impacto tabata di sorpresa y semi frontal.

Testigonan ta conta cu e dama a scapa di milager, mirando cu si e “load Bucket” tabata un poco mas halto , e storia lo tabata diferente y catastrofico. E dama tabata hopi emocional y ta di compronde. E susto di su bida el a caba di pasa aden y cu consecuencianan cu por tabata hopi serio. Ambulance a presenta na sitio pa asina atende cu e victima y sigura cu e no a ricibi golpi y cu por trankilis’e un poco.