Ya caba a informa e trahadonan ayera cu nan no mag di tin ningun tipo di contacto cu nan colega cu ta hefe interino na Instituto Biba Saludabel y Activo (IBISA), cu antes tabata conoci como IDEFRE. Esaki pa motibo cu tin un investigacion andando na e momentonan aki. A prohibi entrada di Director interino di IBISA, Patricia Portier debi na sospecho di fraude financiero di fondonan publico.
A cambia tur lock di porta cual e por haci uzo cu yabi pa yega na e edificio. E trahadonan no a wordo splica den detaye con tur cos ta hinca den otro. E Director sinembargo a confirma na su coleganan cu e daño cometi ta grandi. Esey e resultado di e investigacion lo demostra finalmente. Den henter e situacion aki tin CAD, DRH y tambe Lands Recherche envolvi. Patricia Portier tabata den pasado riba lista di partido RED.
Awendia e ta man drechi di e Director, esta Monique van Embden. E noticia aki a cay manera un baño di awa frieu memey di e coleganan dialuna. Awor tur ta adverti pa evita cualkier contacto cu nan hefe interino cu ta suspendi pendiente e investigacion contra dje. Ainda no a menciona e suma di e fraude financiero cu ta ser papia di dje. E situacion aki ta pone un luz negativo riba IBISA.
