Tin un Investigacion den KIA despues cu e preso Lindenborg a huy diabierna cu a pasa. E hecho cu e preso a huy for di KIA ta motibo di un investigacion. Seis trahador a ser manda cas pendiente investigacion. Dos di nan ta traha na CEA y cuater ta traha como bewaker di KIA. Ambos departamento mester garantiza pa un preso no huy.
E preso tin derecho di huy.
Ta esnan encarga cu cuido y siguridad mester garantiza pa esaki no sosode. E preso aki ta sintando un castigo di 36 luna di prison pa droga. El a haya 42 luna for di hues di cual seis ta condicional. E tin ocho luna caba sera den Kia cu un sentencia riba su cabes. E kier bay sinta castigo na Hulanda. Na Aruba e no tin famia. El a cay sera saliendo cu droga pega na curpa. Hunto cu su tata, un amigo di e tata y un amiga di e amigo di e tata.
A coynan como grupo na Airport. Mas cu 12 kilo nan tur cuater hunto tabata tin pega na curpa. E preso Eric Lindenborg ta sera ainda, e amigo di e tata cu e amiga tambe. E tata di Linderborg a ser manda Hulanda pasobra e ta Detentie Ongeschikt. E tin un malesa y hues a dicidi di lage bay bek Hulanda. E tin como 70 aña di edad.
Mientrastanto e yiu ta sinti su mes su so na Aruba. Leu leu parce e mama sa bin mire. Cu 35 aña el a cay sera y kizas a kere cu facilmente e lo bay liber. E unico manera cu e por a bay liber facilmente tabata diabierna ora sin problema el a prepara su ekipahe y bula cura di afdeling y despues bula e cura di Kia y somenta. Durante e gobernacion anterior a instala henter un sistema nobo di camara. Awor a pidi mas camara. Ta tardando pa haya cierto camara na otro lugarnan cu pa nan ta strategico tambe. Den e momento cu e preso a huy, e tabata lucht su so. Si ta bon esnan di Kia mes mester tabata tin bista riba dje y tambe den e cameraroom mester a sigui e movecionnan. Despues di un ora a ripara cu el a bay.
Ora a bay draai bek e grabacion a realisa cu el a huy bulando cura. Cuater hende a pone responsabel pa e problema aki den Kia. Y pa e vigilancia pafo a pone dos miembro di CEA cu a ser manda cas. Mescos cu personal paden na Kia cu tin acceso pa vigila camara di loke ta pasa paden y pafo di Kia, tin CEA cu tin acceso riba e loke camara ta graba pafo den cura.
Loke a pasa awor ta cu desde cu coriente a bay bin etc, e screen di camara di CEA a kima y ta awe nan no a dreche of busca nobo. Kiermen e pantaya di esnan di CEA ta preto. E problemanan den KIA ta hopi. Minister Andin Bikker no ta worry mes cu Kia. Trahadornan ta demotiva.
Ziekte Melding ta hopi halto. Mester traha hopi overtime. Ainda no por apunta un director y atende e asunto di Kia den forma serio. Yen di problema den KIA y minister no ta haciendo nada segun e trahadornan.
Mas y mas cos ta bayendo atras den KIA. E personal ta disgusta y demotiva. Trahando den situacion desagradabel pa traha aden. No tin programa pa detenido. No tin nada y presonan ta fada. Tin areanan den Kia cu no ta den uso. Esun di HVB cu a kima biaha pasa a ser drecha.
E straf bieu tambe ta casi cla despues cu a ser kima hopi tempo pasa. E HVB ta ultimo cu a kima e aña aki y un parti no ta ser usa.
Personal ta hopi demotiva mirando e circumstancianan trahando aden. Tin reorganzacion cu mester keda cla pa drecha salario di e trahadornan. Minister no ta cumpliendo. E schalering di e trahadornan y no tin nada ainda di e reorganisatie.
Pesey e trahadornan kier keda cla pasobra e cos aki lo nifica mas entrada di salario. Hopi trahador kier bandona Kia. No ta un lugar drechi pa traha aden. Si kier haya liber mester meld ziek pasobra tin ta draai puramente riba overtime.
