Surnameo cu a yega cu Euro busca pa labamento di placa na Hulanda

Diabierna ultimo autoridadnan na Aruba a intercepta un suma rond di 827 mil euro for di un Surnameño di 39 aña biba na Amsterdam, na Hulanda. El a sali for di Paramaribo pa Miami, pero cu escala na Aruba. A detene e homber riba peticion di Ministerio Publico di Amsterdam, despues cu e avion a haci un escala regular na Aruba.

Vocero di Ministerio Publico na Amsterdam solamente kier a bisa cu ta un habitante di Amsterdam, naci na Paramaribo, cu ta sospechoso di labamento di placa y malversacion.

“E ta bay riba un confiscacion preventivo cu nos ta tumando. E homber a wordo deteni na 2016 y tin cu hustifica dilanti Corte na December,” e vocero a bisa. A permiti e homber pa warda su caso den libertad.

19 miyon Euro

Na Mei di 2018, husticia Hulandes na Schiphol a intercepta un envio di placa di mas di 19 miyon Euro pa Surnam. E placa aki a bin di varios banco di Surnam y a wordo confisca, den cuadro cu un investigacion riba labamento di placa.

Desde e momento ey, banconan ya no ta exporta euro cu e miedo cu esakinan tambe ta wordo intercepta. Segun Harmen Boerboom di NOS, esaki a crea un deposito di Euro den e ultimo lunanan y e balor di e moneda a cay fuertemente.

“Por lo tanto, ta lucrativo bay cu Euronan barata for di Surnam y cambianan pa dollar den exterior,” Boerboom a bisa. “Cu esey, por cumpra un biaha mas euronan barata na Surnam. Un simpel calculo ta mustra cu e homber aresta por a gana mas di 100 mil dollar cu e transaccion aki.”

Segun e fuente policial, den e ultimo lunanan, aeropuerto Johan Adolf Pengel di Paramaribo, a intercepta e tipo di transporte aki cu mayor frecuencia durante un vigilancia (stakeout) di Polis y Duana hopi biaha ta intercepta tipo di transportenan asina. “Den algun caso, e cantidad envolvi tabata hasta mayor cu esun di e empresario na Aruba,” Boerboom a bisa.

Ministerio Publico aki na Aruba a informa cu e Euronan confisca na prome instante lo bay den e criminaliteitsfonds di nos isla. Pero un otro decision riba esaki ainda mester delibera cu Ministerio Publico na Amsterdam.