supuesto iregularidatnan enkuanto Refineria di Kòrsou N.V. i “Multi Disciplinair Project Team” (MDTP).

Pa medio di e karta aki nos ta aserká bo persona pa hasi algun pregunta na nòmber di komunidat pa asina nos haña klaridat enkuanto di Refineria di Kòrsou N.V. (RdK) i “Multi Disciplinair Project Team” (MDTP) relashoná ku e proyekto di renobashon di Refineria Isla.

Nos komo parlamentario ku masha preokupashon a tuma nota un biaha mas di deklarashonnan den media tokante supuesto inregularidatnan rondó di RdK i MDTP. E echo ku a firma un “Head of Agreement” (HOA) ku e kompania estatal di China, Guangdong Zhenron (GDZR) e informashon aki riba menshoná lo no ta na bienestar di e negosiashonnan ku tur e konsekuensianan ku esaki por trese kuné pa ku e proyekto di e magnitut aki. Un proyekto ku lo ta un katalisator pa nos ekonomia ku lo bai generá entradanan kuantioso pa gobièrnu pa asina e por mehorá nos situashon sosial i edukashonal di nos komunidat. Nos komo Parlamentario ta mas alerta ainda pa e echo ku RdK dia 13 di yüni último korte a duna veredikto enkuanto e mal maneho ku a hiba pa ku entre otro RdK.

Nos ta sumamente preokupá di e informashonnan ku nos a tuma nota di dje. Mirando e forma kon diligente ku bo persona a bin ta atendé ku entre otro e Ministerio di Asuntunan General nos ta konvensí ku bo persona lo bai atendé ku e supuesto iregularidatnan ku a wòrdu señalá i denunsiá, tantu na ministerio públiko komo den prensa. Nos mester di klaridat i trankilidat pa e proyekto(nan) ku nos tin ku sigui desaroyá huntu ku GDZR pa asina esaki no tin ningun estorbo ku por peligrá e desaroyo aki. Teniendo na kuenta ku e situashon sumamente preokupante i alarmante akiriba menshoná i pa evitá innesesariamente ku e proyekto ku GDZR ta kore peliger. Nos ta urgi minister pa tene kuenta ku e siguiente preguntanan di miembronan di parlamento di Kòrsou.

Preguntanan ku nos komo parlamentarionan ke haña kontesta di minister riba nan ta lo siguiente: 1. Minister por informá parlamento ku minister ta na altura di e deklarashon tendensioso ku a sali den media tokante di RdK i tambe di MDTP? Si esaki ta e kaso kiko ta e informashon ku minister ta disponé di dje? 2. Si e deklarashonnan akiriba menshoná ta kuadra ku realidat kua ta e pasonan ku minister lo bai tuma pa evitá ku esaki por tin un impakto negativo riba e negosiashonnan ku GDZR? 3. Nos por haña un bista riba ki término di tempu minister lo bai atendé e supuesto iregularidatnan akiriba menshoná? Teniendo kuenta di e preokupashon grandi ku tin den komunidat enkuanto RdK i tambe MDTP nos ta keda pendiente pa un kontesta rápido riba nos preguntanan. Na nòmber di Frakshon di Partido MAN den Parlamento di Kòrsou.