Diasabra ultimo e “Task Force” di Coronavirus, den cual tin varios departamento envolvi, entre otro Polis, a bishita no menos di 38 establecimiento comercial pa controla si ta tene suficiente cuenta cu e medidanan di prevencion cu Gobierno a anuncia. Mester bisa cu mas cu mita no ta cumpli y a haya aviso, mientras cu a cera no menos di 17 establecimiento debi cu e situacion tabata di tal magnitud cu no tabata responsabel tene e luga habri.
Minister Presidente no a sconde su desapunto ayera durante e conferencia di prensa di Gobierno. El a bisa cu nos tin 9 pashent interna y esey nos por maneha sin problema den Hospital. Pero cu e cantidad di pashent no por sigui subi pasobra e lo hinca nos den problema. Su desapunto grandi ta ora a inform’e cu tabatin filanan largo na supermercadonan y otro establecimientonan diasabra mainta, comosifuera nada ta pasando y cu comunidad no ta comprende seriedad di e caso y di e peticion pa mantene distanciamento social. Si nos sigui subi caya den dia, manera nos ta actuando awor aki, dificilmente nos por caba cu e virus aki pasobra e posibilidad pa plamemento ta keda presente.
Gobierno a splica cu a decreta un “Shelter in Place” for di 6:00am pa 9:00pm, cu ta nifica cu hendenan mester keda den nan cas y por subi caya solamente si ta pa cumpra cuminda na supermercado, bay botica of pa haci ehercicio. Ta sinti cu publico ta bayendo lama den grupo, otronan ta haci deporte hunto riba veld y asina por sigui menciona. Hopi no ta realisa cu nos no por sigui biba nos bida normal den e temponan aki di Coronavirus mas.
Di e 17 establecimiento comercial cu a cera ta pa motibo cu sea nan a actua contra e Decreto Gubernamental di “Shelter in Place” of cu nan no mester a habri mes debi cu nan no ta escencial of cu nan no tin un sistema di higiena pa ehecuta.
Gobierno a resumi cu ayera nan a bishita 66 cas y a haya tur hende na cas. Por lo menos esey ta bon noticia, cu e hendenan ey ta consciente di nan responsabilidad pa keda cas y evita cu nan por tin e virus sin sa y pega otro cune. Relaciona cu Toque de Queda, a reparti 266 multa na tur cu Polis a detene debi cu ta riba caminda durante oranan prohibi. Te ainda no a detene ningun hende durante “Shelter in Place”. Si a duna 5 negoshi multa debi cu nan a pasa nan orario permiti, mara na TDQ. Te cu awor, 1 solo persona a haya boet pa no cumpli cu cuarentena.
