E siman aki Super Food Plaza Cares Program a haci entrega di otro donacion na Fundacion Pa Nos Comunidad, tambe conoci como voedselbank. E biaha aki a haci donacion di un container di 40 pia yen di comestibles y productonan higienico pa e famianan den necesidad. Cu e donacion aki, casi 800 famia por ricibi un pakete completo di comestibles.
Tabata presente pa e ocacion aki directora di FPNC Sra. Gianaika van der Biezen, Sr. Daniel Tecklenborg di CEDE Aruba como tambe Sr. Rudy Richardson, marketing manager di Super Food Plaza. Super Food Plaza kier a gradici tur su clientenan pa nan donacion cu a haci esaki posible, tambe na Jumbo, GLE Caribbean y GP Cargo pa nan cooperacion. Un danki na tur e voluntarionan tambe cu a yuda descarga e container.
Bo tambe kier yuda famianan den necesidad? Bo por haci un donacion di cumindanan paketa, poniendo nan ariba e mesa destina pa esaki dilanti di Bliss. Tambe bo por haci un donacion financiero na cualkier kassa di e supermercado y e transaction aki lo aparece ariba bo recibo. Tur donacion, grandi of chikito, ta bon bini. Bo por ta sigur cu bo donacion lo yega na esnan cu tin mas mester di dje den nos comunidad. Tur donacion ricibi ta keda supervisa pa CEDE Aruba.
Super Food Plaza Cares Program ta sigui haci tur esfuerzo den e temporada dificil aki pa yuda esnan den necesidad pa pone cuminda ariba mesa. Un danki na tur esnan cu ta yuda sostene e programa aki y hunto nos lo sigui padilanti.
