Sunnery James & Ryan Marciano den Tabula Rasa 2020

Esunnan ku a presensia en tremendo festival di músika Dance na yanüari di e aña aki ahinda ta komentá di e magia musikal ku e festival Tabula Rasa a trese kuné i kon bon nan a pasa.

Henter e esfera ku e organisadónan ta pèrkurá pe; for di ruta yegando e festival, e sentido di un vibe musikal liber, e dekor elektrisante i artistanan di nivel internashonal ta kla un biaha mas pa hibabo na e selebrashon máksimo di un aña nobo.

Un biaha mas Sterck Events (organisadónan di entre otro The Flying Dutch Curaçao) den estrecho kolaborashon ku ALDA events di Hulanda, ta prometé di kombertí e tereno na Fuik Valley di Santa Barbara Beach & Resort den un área di músika, área di kuminda, espektákulo di lus i entretenimento riba un nivel internashonal.

E artistanan prinsipal Sunnery James & Ryan Marciano despues di nan presentashon durante e promé edishon di The Flying Dutch Curaçao a primintí ku nan lo regresá pa un siguiente presentashon. Esaki nan ta kumpli kuné den e di dos edishon di Tabula Rasa 2020. E promé festival ofisial pa selebrá un aña nobo.

Huntu ku artista manera Freddy Moreira, Dopebwoy, Lucas & Steve i tambe Zawdie MC, Tabula Rasa lo ta e festival kaminda bishitantenan for di Hulanda, Merka, Aruba, Bonaire, St. Maarten, Sürnam i Kòrsou ta yama bon bini na e aña 2020.

Nos ta sumamente orguyoso di por anunsiá e artista nan aki pa e di dos edishon di e festival. Dia 3 yanüari próksimo nos lo pèrkurá pa un produkshon sumamente impreshonante kaminda nos lo no spar niun energia pa tene kuenta ku tur detaye, dunando asina e bishitante un selebrashon úniko i mágiko. Segun Herman Harms, bosero di Sterck Events. Sterck Events ta ofresé un kantidat limitá di karchinan “early bird” pa e bishitantenan ku no por warda e dia yega. Esakinan ta optenibel e siman aki via di www.tabularasacuracao.com i na puntonan di benta konosí, segun tin stòk.