Summer Camp pa siña mucha e capacidadnan di siglo 21

E di tres camp di vakantie di Kiwanis Club of San Nicolas e tuma luga e siman aki. Durante cuater dia un total di 60 mucha di e San Nicolas y bisindario tabatin e oportunidad di participa den sesionnan educativo y actividadnan recreacional. E edición 2022 tabata enfoca riba loke ta STEM y SDG. 

STEM ta referi na e materianan di Science, Technology, Engineering y Math, mientras cu SDG ta e Sustainable Development Goals cu Nacionnan Uni a establece pa tur pais cu ta afilia alcansa pa aña 2030. Durante e camp aki a trece tene diferente actividad di tecnologia y a conscientisa e muchanan di kico e SDGnan ta y con nan por aporta pa logra e meta ey.

Diaranson, por ehempel, tabatin un dia caminda a traha hunto cu e agencia gubernamental Futura y a laga e muchanan conoce e mundo di realidad virtual (VR). Tambe e organisadonan a traha cu Code Club Aruba pa duna e muchanan les di coding (crea programa digital).

Fuera di esey tabatin ehercicionan pa stimula team building, pensamento critico y tambe con pa haci uso di material cu por recicla promoviendo e pensamento di economia circular. Ademas di actividad di obra di man, tambe a haya un presentacion di Aruba Bee Haven riba importancia di abeha den preservacion di naturalesa.

“Educacion por ta algo leuk; e por bin den diferente forma. E meta di e camp di Kiwanis Club of San Nicolas ta pa trece capacidadnan di siglo 21, conscientisa nan riba diferente cos cu ta sosode den comunidad y pa motiva nan pa bira lider den futuro,” segun Giandra de Cuba, Director di Children & Youth Services pa Kiwanis Club of San Nicolas, a splica.