Ayera durante dia, miembro di Parlamento pa Fraccion di MEP, Sue-Ann Ras, a firma e mocion di Parlamentario Ricardo Croes di RED, relaciona cu suavisacion di e leynan di drug-test y pa urgi Gobierno pa agilisa e proceso di investigacion riba implementacion di Cannabis medicinal na Aruba. Sinembargo, anochi lat ora di vota, e mesun Parlamentario cu a sostene e mocion, a vota CONTRA dje.
Awe e Miembro di Parlamento pa MEP a aclaria cu berdad el a duna su firma y sosten pa RED por a presenta su mocion. “Y a pesar cu mayoria di nos, a bis’e pa cambia su consideracionnan y tambe cu esaki no ta e momento, el a opta pa sigui”, asina Parlamentario Sue-Ann Ras a indica. Mas leu el a subraya cu firma un mocion pa duna sosten no ta un crimen y masha biaha esaki a yeg’I pasa caba.
“Pero na final loke ta conta ta mi voto y esey awo, e mocion aki no tin”, asina Sue-Ann Ras a termina bisando.
Sue-Ann Shamira Juliette Ras, di 42 aña di edad, procedente di Savaneta, ta miembro di Parlamento di Aruba representando su 362 votadonan. E ta un docente profesional, specialisa entre otro den nos idioma Papiamento.
Sue-Ann ta un di e caranan nobo den politica y nobo riba lista di MEP, cu ta priminti di bin cu un sistema nobo, un aire fresco den politica, ideanan innovativo, formula di traha eficiente y na bienestar di henter pueblo.
