For di momento cu Gobierno Wever Croes a tuma rienda di e pais aki, tabata sa di e retonan critico cu lo tin, ya cu e señalnan y echonan tabata presente, pero e gobierno anterior tabata sa di manipula y sconde tur e rapportnan. Na november 2017 Social Crisis Plan a lanta, ora cu Aruba a keda sacudi pa un tragedia di dos inocente, cu ta representa y refleha e cantidad grandi di caso di abuso di mucha y violencia domestico na Aruba.
CONTROL DI FONDO Y PLAN
Social Crisis Plan ta den pleno ehecucion, despues di a confronta un sinfin di reto. Na caminda a sa di bin cu diferente solucion pa confronta e retonan y mas cu claro esakinan a conduci tambe pa retrasa henter e maneho. Un di e retonan principal tabata esun di fondo, unda cu mester a lanta un ‘begrotingsfonds’ di Social Crisis Plan, cu a haya aprobacion di Parlamento completo, pa asina por realisa y ehecuta Social Crisis Plan. “Mi kier enfatisa y aclarea cu e control di loke ta trata fondo y maneho completo di e Social Crisis Plan ta sosode den diferente fase. No mester descarta niun momento so, cu e retonan social ta enorme y mas cu claro un problema acumula conscientemente pa 8 aña y mas, lo haya solucion den un solo biaha. Tur cos mester cana structura y na un manera mas eficiente y efectivo posibel, unda cu cada instancia y persona en cuestion ta hunga un rol di sumo importancia na bienestar di e realisacion y ehecucion optimal di Social Crisis Plan” Ras a bisa. Durante diferente reunion mensual den 2017 y 2018 a logra yega na creacion di e plan di maneho y programa di exigencia di cada instancia, di cual tur ta relaciona cu e metanan principal di Social Crisis Plan. Cu e dos exigencianan ey, e instancianan ta haya subsidio di e proyecto, hunto cu un ‘ministeriele beschikking’. Esaki ta e prome control, ya cu via e sistema aki, e instancia mester indica exactamente kico e kier logra y con e kier logra realisa su proyecto, pa loke ta trata e Social Crisis Plan.
SIMAN DI REUNION DI PROME RAPORTAHE
E siman aki durante 3 dia intensivo, cada instancia relaciona cu Social Crisis Plan, lo bin pa duna un raportahe di nan status na e team encarga cu Social Crisis Plan, unda cu Ras tambe ta forma parti como presidente di e comision di supervision di Social Crisis Plan. Segun Ras na fin di januari nan a entrega e documentonan exigi, manera ta stipula den e plan di maneho y asina ta bay controla si nan ta cumpli cu e criterianan, pa wak si loke e instancia presenta, ta cuadra cu e metanan di Social Crisis Plan. “No mester lubida cu Parlamento a bin cu un amienda, unda a hinca un mecanismo di control rigoroso y structural den e ley di ‘begrotingsfonds’, cu cada 3 luna esunnan encarga mester bin Parlamento pa responsabilisa nan mes tambe” Ras a finalisa bisa. Pues manera cu tur e reunionnan aki ta tras di lomba, Ras lo pidi un reunion publico tambe pa henter pueblo di Aruba ta na altura di e avancenan y status di Social Crisis Plan, brindando asina transparencia y un maneho vigila di e fondonan publico.
