Sue-Ann Ras (MEP): “Participacion na scol di zomer ta minimalisa e chens pa keda sinta”

Zomer- y Lente school na Hulanda a demostra cu ta baha e cantidad di keda sinta.

E concepto di zomerschool of summerschool (scol di zomer) ta algo masha conoci na varios pais y ta carga e nomber ey, pa e periodo di vacacion durante cual un mucha por haci su ultimo intento di bay over, en bes di tin cu ripiti un aña di nobo. Segun Parlamentario Sue-An Ras di MEP, na 2014 Hulanda a constata cu 5.8% di nan hobennan na scol secundario ta keda sinta y esey tabata un señal hopi alarmante mes. Mientrastanto, na Aruba, UNESCO a bati alarma na momento cu estadistica a indica cu Aruba tin e indice di mas halto den region di keda sinta den klas 1 scol basico (10%), reflehando un deficiencia enorme den e parti di mas fundamental di desaroyo academico di un mucha. “Aki ta unda cu nos por cuminsa pensa pa introduci e concepto di scol di zomer pa Aruba, pa drecha e situacion alarmante aki”, e parlamentario ta sigui bisa.

PAKICO SCOL DI ZOMER
E pregunta mas cardinal den esaki segun Ras ta: Kico nos ta prefera? Dos siman intensivo di les y asina purba pasa e aña escolar toch of ful un aña escolar di nobo, pa motibo di 1 of algun materia of punto (keda sinta pa ‘een tiende punt’)? Na Aruba e indice di mas halto di keda sinta, segun e relato anual di Departamento di Enseñansa 2015-2016, na MAVO, HAVO y VWO ta alrededor di 13%. E ta un cifra hopi alarmante, si mester compara cu Hulanda, cu tabata 5.8% na 2014, ora cu a bati alarma nacional. “Investigacion y testimonio di hopi ta indica, cu na momento cu un mucha of hoben keda sinta, e tin un efecto emocional hopi grandi riba nan. Keda sinta p’e alumnonan aki ta un demotivacion grandi y no ta contribui na nada, pa nan continua exitosamente nan carera escolar”, Ras a continua bisando.

COSTO
Buscando informacion tocante posibel gasto cu keda sinta tin, Ras a bin compronde cu no por a haya e informacion aki pa scol secundario na Aruba. Loke si tin, ta e prijs di keda sinta den scol basico y esaki ta costa pais Aruba, casi Awg1.5 miyon florin pa aña, cu ta alrededor di Awg. 2 mil florin pa alumno.
Na Hulanda si nan a saca afor kico ta costa, ora cu cada alumno keda sinta pa 1 of algun materia/punto na scol secundario. Esaki ta 7.800 Euro, mientras ora cu nan dicidi pa participa na e programa di sea lente of zomer school, e ta costa 450 Euro. P’esey mes Minister di Enseñansa Hulandes su departamento di Centraal Planbureau a dicidi pa pone anualmente casi 9 miyon Euro structuralmente disponibel desde 2015 via un ‘subsidieregeling’.

REALIDAD
Na 2017, 88% di e alumnonan cu a participa na scol di zomer na Hulanda, a logra bay over. Pues por pone un relacion directo y positivo entre e participacion di e alumnonan na scol di zomer y no keda sinta y esaki ta segun investigacion haci di TIER UM (instituut voor onderwijsonderzoek, Universiteit Maastricht). Un total di 155 lentescholen y 112 zomerscholen organisa pa casi 17 mil alumno di diferente klas y nivel.
E situacion di Aruba, basa solamente riba e cantidad di alumnonan cu a keda sinta na MAVO, HAVO y VWO (sin e parti di merdia/anochi), tabata un total di 723 alumno, na comienso di aña escolar 2015, esaki segun relato anual di Departamento di Enseñansa. “Y imagina boso, si nos multiplica esey na e suma cu Hulanda a pone pa cada alumno cu keda sinta den scol secundario, cu ta 7.800 Euro? Nos ta papiando di miyones di florin y mas tristo ta, nos ta papiando di miles di demotivacion y desperdicio di inteligencia di nos hobennan. E ta un motibo suficiente, pa cuminsa pensa riba e implementacion di un scol di zomer pa Aruba”, Ras a finalisa bisando.