Subsidio di salario vs peticion ayudo di Fase: un ta brinda mas proteccion legal cu e otro

1057

Den medionan di comunicacion por a tuma nota cu tin un diferencia basta remarcabel den e forma con ta atende/trata cu e peticionnan relaciona cu e proyecto pa otorga loonsubsidie y e proyecto di ayudo sociaal di Fase. For di e perspectiva di salvaguardia derecho di e aplicante (ciudadano of compania) por a constata cu no ta tur dos ayudo ta brinda un proteccion huridico optimal.

Den e articulo anterior Tienda di Ley a publica diferente articulo importante di e ley administrativo di Aruba esta Lar a wordo repasa. E diferencia con SVb ta manehando peticionnan pa subsidio di salario comparando cu peticionan pa ayudo social di FASE ta grandi den tur sentido. Na prome luga por a constata cu SVb tin un clasificacion mas concreto pa bini na remarca pa e subsidio mientras esun di FASE tin hopi discrepancia. Inicialmente un ciudadano por a aplica pa Fase si 1) el a wordo manda cas sin pago 2) entrada a baha bou 950 florin 3) retira for di trabou. Den scenario 1 e acuerdo laboral a keda vigente pero e trahado no a cobra niun florin. Scenario 2 ta describi un reduccion drastico te bou di 950 florin. E tercer scenario ta indica e situacion cu e acuerdo laboral a termina. Banda di e condicionnan a pidi algun documentacion pa por substancia e condicion cu ta aplicabel pa e aplicante.

E publicacion di e tres diferente scenarionan den medionan di prensa pa bini na remarca pa FASE a duna e impresion cu lo ta trata di un resumen di scenarionan limitativo. Ora cu aplicantenan a haci peticionnan a confronta nan mes cu diferente motibo como base pa nan peticion wordo rechasa. Tienda di ley a wordo informa cu a nenga aplicacion pasobra payslipnan entrega tawata mustra un entrada demasiado abou. Un otro base pa rechasa e ayudo di FASE tawata cu e aplicante no tin un trabou vast (un acuerdo laboral pa tempo indefini). Ademas di e basenan pa rechasa e peticion menciona aki riba e helpdesk tambe a rechasa peticion pasobra e aplicante ta un part-timer. Par di dia pasa por a comprende cu e ultimo grupo aki finalmente lo bay haya e ayudo aki, TdL ta spera cu esaki ya a sosode of lo tuma luga pronto.

E discrepancia entre e motibonan pa rechasa e peticionnan y e condicionnan publica den prensa pa por cualifica pa ayudo ta basta cuestionabel. Na prome luga e helpdesk no a stipula ningun otro suma di entrada cu no ta esun cu a cay bou di grens di 950 florin. Bisando esaki pa haci un distinccion entre un salario cu ta mucho abou of uno cu ta halto NO mester bira un base pa rechasa e peticion. Tampoco nenga e ayudo cu e argumento cu e aplicante no tin un acuerdo laboral pa tempo indefini ta corecto siendo cu algun aplicante cu un contract via uitzendbureau si a logra haya e ayudo di FASE. Den e condicionnan propaganda y informacion publica pa e minister encarga cu asuntonan social ningun rato so a specifica cu lo mester tin un acuerdo laboral pa tempo indefini. Haci un distinccion basa riba esaki lo corta den e vena principal y esencia den e ayudo social pa otorga un suma di 950 florin pa yuda den e temporadanan dificil aki a consecuencia di e pandemia di COVID19. Haci un distinccion entre un full timer y part timer tampoco den nos opinion ta corecto. Si tuma como ehempel un persona cu ta un part timer ta gana minimumloon 1.815,35 florin cu defacto ta trahando 50% di e oranan por papia di un salario di 846.80 florin. E esencia di e ehempel aki ta pa ilustra cu e persona cu ta gana 846.80 florin no tin esey mas pa por conta cu ne. Rechasa un peticion pasobra e aplicante ta un part timer of on call tampoco mester ta un base pa no brinda e ayudo social.

Na un instante a indica cu SVb tin un clasificacion poco cu si ta mustra di ta uno limitativo comparando cu FASE. Esey ta pasobra a uza dos criteria cu ta mas concreto y cu un compania por substancia cu prueba mas solido pa demostra nan ponencia 1) e compania mester tawata vulnerabel pa efecto di medidanan tuma den cuadro di e crisis di Covid-19 y 2) sufri un perdida di minimo di un 25% di entrada. Si bo compania a cera/of bira menos operacional pasobra bo tawata depende pa gran parti di entrada di turismo e consecuencia automatico lo ta cu bo ganashi a cay drasticamente. E chens ta grandi cu bo por mustra na un manera convincente cu cifranan cu por ehempel bo benta a cay y sigur mas cu 25%. Ta mas facil tambe pa por demostra cu bo compania no tawata por a opera pasobra esaki lo a cay bou uno categoriza como NO-esencial y como tal e tawata cera y cu consecuencia cu e entrada a bay atras.

E diferencia mas grandi entre e dos ayudonan ta cu e subsidio di salario te cu aworaki ta dunando e aplicantenan cual peticion a wordo rechasa e oportunidad di haci un procedura di obheccion. Kiermen cu den e caso aki si por papia di un proteccion huridico, esta un caminda pa cana si dado caso bo peticion wordo rechasa. SVb a bay asina leu di anuncia den prensa cu e ta activa un e-mail adres specifico pa e proceso di entrega bezwaarschriften (carta di obheccion). Mientras na e otro banda esnan trahando pa FASE den diferente caso ta djis nenga e ayudo telefonicamente of den hopi caso (tin algun si y otro no)  NO ta yega ni asina leu pa informa dicon  e aplicante no ta cualifica na e condicionan publica pa Departamento di asuntonan social. E discrepancia aki y falta di proteccion huridico huridico sigur ta uno hopi decepcionante pa un ciudadano cu desesperadamente a conta cu e lo haya e ayudo aki.

For di e perspectiva huridico Tienda di Ley ta spera cu e minister encarga por compronde ki tipo di eror y negligencia ta cometiendo cu ciudadanonan di Aruba. Ta spera cu pronto mayoria aplicante por haya e ayudo social aki pasobra nan ta dependiendo di dje.