Luis Villegas a bay Hulanda pa studia ley y ta forma parti di e grupo di studiante cu a biaha den fin di siman. Den e tres vuelonan ey tabatin algun studiante cu despues a test positivo pa Covid-19, aunke Villegas mes a test negativo. El a splica cu studiantenan no mester a haci test di Covid prome di biaha pa Hulanda. E sa cu pa bin Aruba y Corsou mester haci e test 72 ora prome.
Villegas a indica di no ta na altura cu ora bay Hulanda, mester haci e test. Aruba Huis y Departamento di Enseñansa no a bisa nan nada over di e test, p’esey nan no a haci esaki. Na yegada, e proceso tabata practicamente manera tur otro biaha, scan paspoort y no tabatin nada special. Pa cada ken yega na nan destino mester a bay den busnan y e tabata bay Den Haag. Su grupo tabata esun di mas grandi compara cu e otronan.
El a sigui splica cu e tabata hopi cuidadoso y tabata mantene distancia. Loke el a ripara tabata cu mayoria hende no a mantene nan mes na distancia social. Durante nan estadia na hotel, e no a ripara sintoma na ningun hende, pero el a bin haya sa na momento cu Aruba Huis tambe a haya sa di e sintomanan bou di studiantenan.
Den un encuentro di e programa di Aruba Huis, un studiante a bisa di tin cierto sintoma y aki ta unda nan a bay haci test cu ne. Asina aki a cuminsa test e studiantenan y Villegas su resultado tabata negativo. E grupo di Den Haag a ricibi bon yudansa y pa esaki e ta contento.
E ta di pensamento cu studiantenan mester ta mas consciente di esey, pasobra por tin tiki sintoma y no mester haya keintura. El a bay haci test na momento di a informa cu ta sinti molester di garganta. Tin cu haci e test, pasobra ta trata e siguridad di tur persona.
