Studiantenan di Facultad di Ley di UA cu protesta pasivo dialuna awo

Studiantenan di diferente añanan academico, for di 1 te cu 4, den un forma di protesta pasivo, kier a manda un mensahe tanto na Management di Universidad di Aruba como tambe na e minister di enseñansa, cu nan lo para y demosta nan sosten pa docente mr. dr. Rycond R. Santos do Nascimento.

E studiantenan ta aprecia e trabao cu e docente a bin ta haciendo y ta urgi pa wanta e docente na e Universidad, kende sin duda ta aporta grandemente na e formacion academico di e studiantenan.

E protesta pasivo aki lo tuma luga dialuna, dia 9 di maart, for di 1’or y mey pa 2’or di merdia, riba e parkinglot di Postkantoor, otro banda di Universidad di Aruba.

Studiantenan kier pone enfasis cu e protesta pasivo aki den ningun forma ta vincula of ta parti di ningun agenda politico y ta pidi organisacionan politico pa respeta e protesta pasivo aki di studiantenan.